მარიამ ქვრივიშვილი - ტურისტულმა სექტორმა დადებითად შეაფასა ის გარემოება, რომ მთავრობა ბიზნესს უსმენს და მათ თხოვნებს ითვალისწინებს
პრემიერ-მინისტრის დავალებით, საქართველოს ეკონომიკისა და მდგრადი განვითარების სამინისტროში მინისტრის მოადგილე მარიამ ქვრივიშვილმა განთავსების ობიექტების, საქართველოს შემომყვან ტურ-ოპერატორთა ასოციაციების, სასტუმროებისა და რესტორნების ფედერაციის წარმომადგენლებთან შეხვედრა გამართა. ეკონომიკისა და მდგრადი განვითარების სამინისტროს ცნობით, მას ასევე სსიპ ტურიზმის ეროვნული ადმინისტრაციის ხელმძღვანელის მოვალეობის შემსრულებელი მედეა ჯანიაშვილი დაესწრო.
უწყების ინფორმაციით, შეხვედრის მონაწილეებმა დადებითად შეაფასეს ის გარემოება, რომ მთავრობა ბიზნესს უსმენს და მათ თხოვნებს ითვალისწინებს.
მარიამ ქვრივიშვილის განცხადებით, მნიშვნელოვანია, რომ ტურიზმის სექტორის წარმომადგენლებთან მთავრობის უკუკავშირი ეფექტურია.
„მოხარული ვარ, რომ კერძო სექტორმა დადებითად შეაფასა საკოორდინაციო საბჭოს მიერ მიღებული გადაწყვეტილება. ბიზნესისთვის მნიშვნელოვანია, რომ მთავრობა ბიზნესს უსმენს და ითვალისწინებს მათ მოთხოვნებს. კერძო სექტორისთვის მნიშვნელოვანი კომპონენტები შემსუბუქდა, რაც ხელს შეუწყობს ტურიზმის უსაფრთხოდ განვითარებას და აღდგენას და გააძლიერებს კერძო სექტორს,“ - განაცხადა მინისტრის მოადგილემ.
ეკონომიკისა და მდგრადი განვითარების სამინისტროს ცნობით, შეხვედრაზე ყურადღება გამახვილდა „მწვანე პასპორტის“ ამოქმედების გავლენაზე ადგილობრივი ტურისტული სექტორის საქმიანობაზე, აღნიშნული კონცეფციის აღსრულების შესაძლო მექანიზმებსა და სხვ. უწყების განმარტებით, აღინიშნა, რომ ეკონომიკისა და მდგრადი განვითარების სამინისტროს ორგანიზებით შეხვედრები ტურისტული სექტორის წარმომადგენლებთან გაგრძელდება.