ევროპის მედიკამენტების სააგენტომ 5-11 წლის ასაკის ბავშვებში „ფაიზერის“ ვაქცინის გამოყენება დაამტკიცა
ევროკავშირის მარეგულირებელმა ორგანომ, ევროპის მედიკამენტების სააგენტომ 5-11 წლის ასაკის ბავშვებში კორონავირუსის საწინააღმდეგო „ფაიზერ/ბიონტექის“ ვაქცინის გამოყენების ნებართვა გასცა.
უწყების რეკომენდაციის თანახმად, აღნიშნული ასაკის ბავშვებს ვაქცინის 10 - მიკროგრამიანი დოზით, ორჯერ, სამი კვირის შუალედით აცრიან.
„ვაქცინის 5-დან 11 წლის ასაკის ბავშვებში გამოყენების სარგებელი აღემატება რისკებს“,- ნათქვამია ევროპის მედიკამენტების სააგენტოს განცხადებაში.
ვაქცინის გამოყენება საბოლოოდ ევროკომისიამ უნდა დაამტკიცოს, რომელიც, როგორც წესი, ევროპის მედიკამენტების სააგენტოს რეკომენდაციას ითვალისწინებს.
„დღევანდელი რეკომენდაციით აშკარაა, რომ „ფაიზერ/ბიონტექის“ ვაქცინა უსაფრთხო და ეფექტურია მცირეწლოვანი ბავშვებისთვის და შეუძლია მათ დამატებითი დაცვა შესთავაზოს“, - განაცხადა ევროკავშირის კომისარმა ჯანდაცვის საკითხებში სტელა კირიაკიდესმა.
ცნობისათვის, ევროკავშირის ქვეყნებისთვის „ფაიზერ/ბიონტექის“ ვაქცინის 12-17 წლის ბავშვებში გამოყენება მიმდინარე წლის მაისში დაამტკიცეს.