ირაკლი ღარიბაშვილი დავოსში სესიაზე სიტყვით გამოვიდა
საქართველოს პრემიერ-მინისტრი, ირაკლი ღარიბაშვილი დავოსში ვიზიტის ფარგლებში სიტყვით გამოვიდა სესიაზე - "მოგზაურობა და ვაჭრობა მაღალი რისკების ეპოქაში".
პრემიერ-მინისტრის პრესსამსახურის ინფორმაციით, ირაკლი ღარიბაშვილმა სიტყვით გამოსვლისას ყურადღება გაამახვილა ღია საზღვრების პოლიტიკაზე. "დღევანდელ მსოფლიოში თავისუფალი და ღია საზღვრების პოლიტიკა, როგორც ასეთი, არის ურთიერთსასარგებლო თანამშრომლობის, მდგრადი ეკონომიკური განვითარებისა და კეთილდღეობის უზრუნველყოფის წინაპირობა. ღია საზღვრებს შეუძლია არსებითი სარგებლის მოტანა. ევროკავშირში ადამიანები მოგზაურობენ თავისუფლად, ასევე დაუბრკოლებლად ხდება პროდუქციის ტრანსპორტირება და მომსახურების მიწოდება. ვაჭრობის ლიბერალიზაცია და მსოფლიოს წამყვან ბაზრებში ინტეგრაცია არის საქართველოს საგარეო პოლიტიკის მთავარი პრიორიტეტი. ასოცირების ხელშეკრულების ხელმოწერის შედეგად (ღრმა და ყოვლისმომცველი თავისუფალი სავაჭრო სივრცის ჩათვლით), საქართველომ გადადგა უდიდესი ნაბიჯი წინ. ეს ხელშეკრულება იძლევა ევროკავშირთან სავაჭრო ურთიერთობებში სატარიფო და არასატარიფო დაბრკოლებების მოხსნის შესაძლებლობას. გარდა ამისა, ის არეგულირებს ვაჭრობასთან დაკავშირებული საკითხების ფართო სპექტრს", - აღნიშნა ირაკლი ღარიბაშვილმა.
პრემიერ-მინისტრმა სიტყვით გამოსვლისას განაცხადა, რომ თავისუფალმა ვაჭრობამ მეზობლებსა და ცენტრალური აზიის ქვეყნებთან უკვე მოიტანა საგრძნობი პოზიტიური შედეგები. ამ ეტაპზე საქართველოს აქვს თავისუფალი ვაჭრობა დაახლოებით ერთი მილიარდი მომხმარებლის ბაზართან ევრაზიის კონტინენტზე და მთავრობა ძალ-ღონეს არ იშურებს, რათა უზრუნველყოს ვიზების ლიბერალიზაცია და თავისუფალი ვაჭრობა ევროპის თავისუფალი ვაჭრობის ასოციაციის სხვა წევრ ქვეყნებთან, ასევე აშშ-სა და კანადასთან.
სიტყვით გამოსვლისას საქართველოს პრემირ-მინისტრმა ყურადღება გაამახვილა ღია საზღვრების პოლიტიკის წინაშე მდგარ გამოწვევებზე, ასევე ისაუბრა პარტნიორობის აუცილებლობაზე რისკების ერთად და კოორდინირებულად დასაძლევად. საქართველოს პრემიერ-მინისტრი კიდევ ერთხელ გამოვიდა ინიციატივით, თბილისში მოეწყოს აბრეშუმის გზის ფორუმი, სადაც მონაწილეობას მიიღებს ყველა დაინტერესებული სახელმწიფო და საერთაშორისო ორგანიზაცია.