"ნაციონალური მოძრაობა": რუსული ავიაკომპანიების საქართველოს ინტერესების საწინააღმდეგოდ შემოყვანაზე მოლაპარაკებები იგეგმება

"ნაციონალური მოძრაობის" ინფორმაციით, საქართველოსა და რუსეთს შორის რუსული ავიაკომპანიების შემოყვანასთან დაკავშირებით მორიგი მოლაპარაკებები 25 იანვარს იგეგმება.

ამის შესახებ "ნაციონალური მოძრაობის" განცხადებაშია ნათქვამი.

"ჩვენ შევიტყვეთ, რომ 25 იანვარს, საზოგადოების ზურგს, უკან გაიმართება მორიგი მოლაპარაკებები საქართველოსა და რუსეთს შორის რუსული ავიაკომპანიების საქართველოში კაბალური პირობებითა და ჩვენი ქვეყნის ინტერესების საწინააღმდეგოდ შემოყვანასთან დაკავშირებით. საქართველოს მხრიდან ამ მოლაპარაკებებს აწარმოებს ივანიშვილის პირადი ბორტ-ინჟინერი, რომელიც მან დანიშნა ავიაციის დეპარტამენტის უფროსად. ამ მოლაპარაკებებისთვის რუსეთიდან სპეციალური ჯგუფი ჩამოდის. გვინდა ცალსახად განვაცხადოთ, რომ ჩვენ არ ვართ წინააღმდეგი ზოგადად ქართული საჰაერო სივრცის გახსნის და ამ სექტორში თავისუფალი საბაზრო მიდგომების გამოყენების, მაგრამ ჩვენ მივიჩნევთ, რომ აქ არ უნდა შემოდიოდენ ავიაკომპანიები, რომლებიც "ოკუპირებული ტერიტორიების შესახებ" საქართველოს კანონს არღვევენ (მაგალითად "აეროფლოტი"), ავიაკომპანიები, რომლებიც არიან პირადად პუტინის მფლობელობაში (მაგალითად, "უტეაირი" (UTAIR) და ავიაკომპანიები, რომლებსაც დასავლური სანქციების გამო ძალიან დიდი მოცულობის ვალები აქვთ და აქ შეიძლება შემოდიოდნენ მხოლოდ პოლიტიკური და არა ბიზნეს მოტივებით (მაგალითად "ტრანსაერო"). ჩვენ ასევე ვეწინააღმდეგებით მოლაპარაკებების საზოგადოების ზურგს უკან ფარულად წარმოებას", - ნათქვამია "ერთიანი ნაციონალური მოძრაობის" განცხადებაში.