თვითდასაქმებულთა და დაქირავებით დასაქმებულთა კომპენსაციისთვის, ორი წლის განმავლობაში, 300 მილიონ ლარზე მეტი დაიხარჯა
დასაქმების ხელშეწყობის სახელმწიფო სააგენტოს დირექტორის, ნინო ველთაურის განცხადებით, ორი წლის განმავლობაში დასაქმებულთა კომპენსაციისთვის 300 მილიონ ლარზე მეტი დაიხარჯა.
როგორც ველთაურმა ჟურნალისტებს განუცხადა, კომპენსაციის გაცემის პირველ ეტაპზე დახმარება 248 ათასმა თვითდასაქმებულმა მიიღო, ხოლო 200-ლარიანი დახმარება სხვადასხვა ხანგრძლივობით 165 ათას პირზე გაიცა.
„პირველ ჯერზე 248 ათასი თვითდასაქმებული იყო, ვინც კომპენსაცია მიიღო დაახლოებით 75 მილიონის ფარგლებში. 200-ლარიანი კომპენსაციის მიმღები პირველ ეტაპზე 165 ათასი უნიკალური პირი იყო - ზოგმა ერთი, ზოგმა ორი და ზოგმა ექვსი თვის განმავლობაში მიიღო კომპენსაცია.
მეორე ეტაპის კომპენსაციებით დეკემბერში ისარგებლა 155 ათასმა ადამიანმა. დაახლოებით ამ რაოდენობის იყო იმ დაქირავებით დასაქმებულთა რაოდენობაც, რომელთაც 2021 წელს მეორე ეტაპზე მიიღეს 200-ლარიანი კომპენსაცია. ჯამში ორივე წელს კომპენსაციების სახით 300 მილიონზე მეტი ლარია დახარჯული”,- განაცხადა ნინო ველთაურმა.