საქართველოს აეროპორტების გაერთიანება "საუკეთესო წლიური ანგარიშის და გამჭვირვალობის 2021"-ის შერჩეულ მონაწილედ დასახელდა

საქართველოს აეროპორტების გაერთიანება (UAG), მეორედ ბუღალტრული აღრიცხვის, ანგარიშგებისა და ფინანსური გამჭვირვალობის ყოველწლიურ კონკურსში (BARTA) შერჩეულ მონაწილეთა შორის (shortlisted participant) დასახელდა. ამის შესახებ ინფორმაციას საქართველოს აეროპორტების გაერთიანება ავრცელებს.

მათივე ცნობით, კომპანია „საუკეთესო წლიური ანგარიშის და გამჭვირვალობის ჯილდო-2021“-ის კონკურსში მონაწილეობას უკვე მეორედ იღებს კატეგორიაში მცირე და საშუალო კომპანიები, სადაც 500-ზე ნაკლები ადამიანია დასაქმებული. ყოველწლიური ღონისძიების ორგანიზატორია მსოფლიო ბანკი, ევროკავშირი და საქართველოს აუდიტისა და ანგარიშგების რეფორმების მხარდაჭერის ეროვნული ფონდი.

საქართველოს აეროპორტების გაერთიანების დირექტორმა თამარ არჩუაძემ ორგანიზატორებს კომპანიის აღიარებისთვის მადლობა გადაუხადა.

,,საქართველოს აეროპორტების გაერთიანება უკვე მეორე წელია კონკურსში ერთვება. სასიხარულოა, რომ ე.წ. shortlisted მონაწილე ვართ. ჩვენთვის, როგორც საზოგადოებრივი დაინტერესების პირისთვის მნიშვნელოვანია, რომ კომპანიის ფინანსური ანგარიშგებები იყოს გამჭვირვალე. ვაკმაყოფილებთ რა ფინანსური ანგარიშგების მიმდინარე მოთხოვნებს, რაც დასტურდება აუდიტის დასკვნით და ბუღალტრული აღრიცხვის, ანგარიშგებისა და აუდიტის ზედამხედველობის სამსახურში (SARAS) წლიური ანგარიშის დროული წარდგენით“, -აცხადებს თამარ არჩუაძე.

ცნობისთვის, ღონისძიება პირველად 2019 წელს ჩატარდა და კომპანიების ანგარიშგების და გამჭვირვალობის ხარისხის ამაღლებას ისახავს მიზნად. კონკურსში მონაწილეობის მისაღებად კომპანიები წლიური ანგარიშის ფარგლებში მმართველობითი, კორპორაციული მართვის და არასაფინანსო ანგარიშგებებს წარადგენენ.