2021 წელი ფასდება, როგორც პოზიტიური შედეგების მქონე წლად, ტურიზმის აღდგენის მიმართულებით
ტურიზმის ეროვნული ადმინისტრაციის მონაცემებით, 2021 წელს საერთაშორისო მოგზაურებიდან საქართველომ 1,2 მილიარდი აშშ დოლარის შემოსავალი მიიღო, რაც 130 პროცენტით მეტია 2020 წელთან შედარებით. ამის შესახებ ინფორმაციას ეკონომიკისა და მდგრადი განვითარების სამინისტრო ავრცელებს.
მათივე ინფორმაციით, შემოსავლებმა საერთაშორისო მოგზაურებიდან 2019 წლის მაჩვენებლის 38 პროცენტი შეადგინა.
ეკონომიკისა და მდგრადი განვითარების მინისტრის მოადგილე მარიამ ქვრივიშვილის განცხადებით, 2021 წელი ფასდება, როგორც პოზიტიური შედეგების მქონე წლად, ტურიზმის აღდგენის მიმართულებით.
„ყველა ქვეყნისთვის, რომელიც ტურისტულად აქტიურია, შეფასების მთავარი ამოსავალი არის შემოსავლები. თუკი ქვეყანა ეკონომიკურ სარგებელს ვერ პოვებს ამ ინდუსტრიიდან, მაშინ მას ისეთი პოზიტიური ეფექტი ვერ ექნება ქვეყანაზე, მის ეკონომიკურ მდგომარეობაზე, დასაქმებაზე. სწორედ ამიტომაც განსაკუთრებით სასიხარულოა, რომ 2021 წელს ტურიზმიდან მიღებული შემოსავლები, ფაქტობრივად, 40 პროცენტამდე აღდგა 2019 წელთან შედარებით. ალბათ, ეს არის პირველი ინდიკატორი, რითაც ჩვენ შევაფასებთ გასულ 2021 წელს როგორც საკმაოდ პოზიტიური შედეგების მქონეს ტურიზმის აღდგენის მიმართულებით“, - განაცხადა ეკონომიკისა და მდგრადი განვითარების მინისტრის მოადგილე მარიამ ქვრივიშვილმა.
მინისტრის მოადგილის განცხადებით, აქტიურად აპირებენ სამიზნე ქვეყნებთან მუშაობას, როგორიცაა: აშშ, ჩინეთი, იაპონია და სხვა ქვეყნები, სადაც საქართველოს პოპულარიზაციაზე იმუშავებენ.
„უცვლელია ჩვენი პოზიცია, რომ მაქსიმალურად ვაკეთებთ აქცენტს მხარჯველუნარიანი ტურისტის მოზიდვაზე და ამაში გვეხმარება პირდაპირი საჰაერო მიმოსვლები ევროკავშირის ქვეყნებთან, სპარსეთის ყურის სახელმწიფოებთან და სხვ. აქტიურად ვმუშაობთ ტურისტების ჩამოყვანაზე ისეთი ქვეყნებიდან, როგორიცაა აშშ, ჩინეთი, იაპონია და სხვ. ამ ქვეყნებიდან შემოსული თითოეული ტურისტი საშუალოდ უფრო მეტს ხარჯავს, ვიდრე ჩვენი მეზობელი ქვეყნებიდან შემოსული ტურისტები, რომელთა ჩამოსვლაც ჩვენი ტურიზმის სექტორისთვის ასევე ძალიან მნიშვნელოვანია. ამდენად, ჩვენ 2022 წელს ვაპირებთ მუშაობის გაგრძელებას სამიზნე ქვეყნებთან, სადაც ჩვენი ქვეყნის პოპულარიზაციას მოვახდენთ,“ - განაცხადა მარიამ ქვრივიშვილმა.