პარასკევის ბირჟაზე უმნიშვნელო მატების შემდეგ, ნავთობზე მსოფლიო ფასი კლებას განაგრძობს.
”როიტერის” ინფორმაციით, ”ბრენტის” მარკის ნავთობზე ფასი ბარელზე 1,06 დოლარით შემცირდა და დღევანდელი დილის მონაცემებით, 51,93 დოლარი შეადგინა, WTI-ის მარკის ნავთობზე ბარელზე ფასი კი 1,02 დოლარით გაიაფდა და 47,24 დოლარი დაფიქსირდა.
დღეს დილით მსოფლიო ნავთობზე ფასების ვარდნას ანალიტიკოსები აშშ-ში საბურღი მოწყობილობების რაოდენობის შემცირებას უკავშირებენ, რომელმაც ბოლო ხუთი წლის განმავლობაში მინიმუმს მიაღწია. როგორც გასული კვირის ბოლოს ნავთობსაგაზო სერვის კომპანია Baker Hughes-მა განაცხადა, საბურღი მოწყობილობების რაოდენობა 90-ით შემცირდა და 1 543 შეადგინა, რაც 2010 წლის შემდეგ ყველაზე დაბალი მაჩვენებლია. დღევანდელ ბირჟაზე ნავთობის ფასის კლების ერთ-ერთ მიზეზად სახელდება ასევე ნავთობგადამამუშავებელი საწარმოების თანამშრომელთა გაფიცვაც.
1980 წლის შემდეგ, პირველად აშშ-ში ნავთობგადამამუშავებელი საწარმოს თანამშრომელთა მასშტაბური გაფიცვა გუშინ დაიწყო. გაფიცვაში 3 500-ზე მეტი ადამიანი მონაწილეობს. აშშ-ის 200-ზე მეტი ნავთობკომპანიის თანამშრომელთა ინტერესების დამცველი გაერთიანებული პროფკავშირები კომპანიებისგან თანამშრომელთა სამუშაო პირობების გაუმჯობესებას მოითხოვს.