ნავთობ იმპორტიორთა კავშირის თავმჯდომარემ, ვანო მთვრალაშვილმა, რადიო ,,პალიტრისა“ და ,,პალიტრანისუსის“ გადაცემაში ,,საქმე“ განმარტა, თუ რამდენით შემცირდება საქართველოში საწვავის ფასი, თუ სახელმწიფო ყველა გადასახადს გაანულებს.
მისი თქმით, მომხმარებელი დაახლოებით, 1 ლარამდე გაიაფებულ საწვავს მიიღებს, თუმცა, სახელმწიფო ძალიან დიდ შემოსავალს დაკარგავს.
„მაგალითად, პოლონეთმა გააკეთა ასეთი რეფორმა, ომამდე, 1-ელ თებერვალს, დამატებითი ღირებულების გადასახადი 23%-დან ჩამოიყვანა 7%-მდე. ამან პოლონეთში საწვავის ფასები შეამცირა. თუ სახელმწიფო გაანულებს ყველანაირ გადასახადს, აქციზის გადასახადს, დამატებით ღირებულების გადასახადს, დიდი ალბათობით, ფასი 80 თეთრიდან 1 ლარამდე შემცირდება. ანუ, თუ გაანულებს ყველაფერს, მომხმარებელი ლარით ნაკლებად მიიღებს პროდუქტს, მაგრამ სახელმწიფო მიმდინარე ეტაპზე დაკარგავს ძალიან დიდ შემოსავალს“,- განაცხადა ვანო მთვრალაშვილმა.