ღვინისა და ალკოჰოლური სასმელების ხარისხის კონტროლი ახალი რეგულაციებით განხორციელდება
ღვინისა და ალკოჰოლური სასმელების ხარისხის კონტროლის სისტემის გაუმჯობესების მიზნით, ალკოჰოლური სასმელების სერტიფიკაციის ახალი წესები ამოქმედდა, - ამის შესახებ ინფორმაციას სოფლის მეურნეობის სამინისტრო ავრცელებს.
სოფლის მეურნეობის მინისტრის, ოთარ დანელიას განცხადებით, განხორციელებული ცვლილებების შედეგად, სოფლის მეურნეობის სამინისტროს ღვინის ეროვნულ სააგენტოს საშუალება ექნება უფრო ეფექტიანად და კვალიფიციურად წარმართოს ალკოჰოლური სასმელების სერტიფიცირების, საინსპექციო კონტროლის და მასთან დაკავშირებული სხვა პროცედურები. მისივე თქმით, სავალდებულო ხდება საქართველოში წარმოებული ღვინისა და ალკოჰოლური სასმელების მარკირება სპეციალური ნომრით, რაც შესაძლებელს გახდის პროდუქტის მიკვლევადობას წარმოების ნებისმიერ ეტაპზე. თითოეულ ბოთლზე დატანილი ლოტის ნომერი (L….) მაკონტროლებლებს საშუალებას მისცემს, სრული ინფორმაცია მიიღონ.
მისი თქმით, აღნიშნული ცვლილება იქნება ქართული ღვინისა და ალკოჰოლური სასმელების მაღალი ხარისხის გარანტი და ხელს შეუწყობს ფალსიფიკაციის პრევენციას როგორც საქართველოში, ასევე მის ფარგლებს გარეთ/საექსპორტო ქვეყნებში. როგორც ოთარ დანელია აცხადებს, ახალი რეგულაციების თანახმად, ქართული ღვინისა და ალკოჰოლური სასმელების წარმოებითა და ექსპორტით დაინტერესებული მეწარმეებისთვის გამარტივდება ალკოჰოლური სასმელების სერტიფიკაციასთან დაკავშირებული პროცედურები და ექსპორტიორებისთვის ნაკლები დანახარჯებით მოხდება ექსპორტი. კერძოდ: მეწარმეები განახორციელებენ პროდუქციის ერთი მთლიანი ლოტის ერთჯერად შემოწმებას და აღარ იქნება საჭირო ამ ლოტიდან ყოველი სარეალიზაციო პარტიის ხელახალი ლაბორატორიული და სადეგუსტაციო შემოწმება.
ახალი რეგულაციები ღვინისა და ალკოჰოლიანი სასმელების სერტიფიკაციის წესებში, ხელს შეუწყობს ქართული ღვინისა და ალკოჰოლური სასმელების ხარისხის ამაღლებასა და პოპულარიზაციას.