კომპანია Apple პირველი ამერიკული კომპანია გახდა, რომლის კაპიტალიზაციამ 700 მილიარდ დოლარს გადააჭარბა.
ამ მიღწევით სტივ ჯობსის დაარსებული კომპიუტერული კომპანია მსოფლიოს ყველაზე ძვირადღირებული კომპანია გახდა. Nasdaq-ის ბირჟაზე Apple-ის აქციების ღირებულებამ 122,02 დოლარი შეადგინა, რის შემდეგაც ამერიკული კომპანიის საბაზრო კაპიტალიზაცია 710,7 მილიარდ დოლარად შეფასდა.
CNN-ის ცნობით, ამ დრომდე ვერც ერთი ამერიკული კომპანია ვერ ახერხებდა კაპიტალიზაციის 700-მილიარდიანი ნიშნულის გადალახვას. Apple-ის კაპიტალიზაციის ასეთი შეფასება ორჯერ აღემატება Google-ს, 8-ჯერ - ”მაკდონალდსის” და 24-ჯერ აჭარბებს ”ტვიტერის” კაპიტალიზაციის მაჩვენებელს. ტექნოლოგიური გიგანტის უახლოესი მდევარი ყველაზე ძვირადღირებულ ამერიკულ კომპანიებს შორის მხოლოდ ნავთობკომპანია Exxon Mobil-ია, რომელიც 384 მილიარდ დოლარად არის შეფასებული.
1980 წლის დეკემბრიდან მოყოლებული, როდესაც Apple-ის აქციები პირველად გამოიტანეს ბირჟაზე, კომპანიის საბაზრო ღირებულება 50 პროცენტზე მეტით გაიზარდა. Apple-ის ბოლო ანგარიშის თანახმად, გასული წლის მეოთხე კვარტალში - სექტემბრიდან დეკემბრის ჩათვლით - კომპანიამ 74 მილიონი iPhone გაყიდა, რამაც რეკორდული - 18 მილიარდი დოლარის მოგება მოუტანა. ამერიკული კომპანიის აღმასრულებელი დირექტორი ტიმ კუკი რამდენიმე ადგილობრივმა გამოცემამ 2014 წლის საუკეთესო აღმასრულებელ დირექტორად დაასახელა, Financial Times-მა კი წლის ადამიანად აღიარა.