თბილისში საქართველო-რუმინეთის ბიზნესფორუმი გაიმართება
თბილისში, წელს საქართველო-რუმინეთის ერთობლივი ეკონომიკური კომისიის სხდომა და საქართველო-რუმინეთის ბიზნესფორუმი გაიმართება.
საქართველოს მთავრობის ადმინისტრაციის პრესსამსახურის ინფორმაციით, ერთობლივი კომისიის აღდგენაზე ორი ქვეყნის მთავრობის წევრები გაფართოებული მოლაპარაკებებისას შეთანხმდნენ, რომელიც ირაკლი ღარიბაშვილისა და ვიქტორ პონტას პირისპირ შეხვედრის შემდეგ გაიმართა. მათივე ცნობით, შეხვედრის დასაწყისში რუმინეთის პრემიერ-მინისტრმა ქართველ კოლეგას ბრიუსელში წარმატებული ვიზიტი მიულოცა და საქართველოს ევროატლანტიკური მისწრაფებებისადმი მხარდაჭერა კიდევ ერთხელ გამოხატა.
"მხარეებმა ორი ქვეყნის ეკონომიკური თანამშრომლობის გაღრმავებაზე ისაუბრეს და კონკრეტული საინვესტიციო პროექტები განიხილეს. საუბარი შეეხო საქართველოს ტურისტულ და სატრანზიტო პოტენციალს. შეხვედრაზე აღინიშნა, რომ მთავრობა მიესალმება რუმინელ ინვესტორებს საქართველოში, სადაც დაცულია კანონის უზენაესობა, საკუთრების უფლებები და ბიზნესის წარმოებისთვის ხელსაყრელი გარემო არსებობს", - აცხადებენ საქართველოს მთავრობის ადმინისტრაციის პრესსამსახურში.
მათივე ინფორმაციით, გაფართოებული მოლაპარაკებების შემდეგ ხელი მოეწერა შეთანხმებას ორ ქვეყანას შორის კულტურულ, სპორტულ და მედიის სფეროებში თანამშრომლობის შესახებ. ასევე, დაიგეგმა საქართველოსა და რუმინეთის სოფლის მეურნეობის სამინისტროებს შორის თანამშრომლობის გააქტიურება.