კვლევის თანახმად, ათიდან რვა ესპანელი (81,5%) ბედნიერია თავისი სამსახურით
სპორტსმენი, მეცნიერი და მასწავლებელი - ესპანეთში ყველაზე "ბედნიერ" პროფესიებად დასახელდა.
საერთაშორისო კომპანია "ადეკოს" მიერ გამოქვეყნებული რეიტინგის თანახმად, გამოკითხვის დროს სპორტსმენთა 98,9%-მა, მასწავლებელთა 95,15%-მა და მეცნიერთა 94,45%-მა განაცხადა, რომ სიხარულით ასრულებენ თავიანთ პროფესიულ მოვალეობას და ამის გამო თავს ბედნიერად გრძნობენ.
"ადეკოს" ინფორმაციით, "ბედნიერების ინდექსი" ასევე გადალახეს ადვოკატებმა (92%), მედიცინის მუშაკებმა (91,67%) და მხატვრებმა (91,18%). რეიტინგში ფიგურირებენ ფსიქოლოგები, ჟურნალისტები და მეხანძრეებიც.
საერთო ჯამში, საერთაშორისო კომპანიის მიერ ესპანეთში ჩატარებულმა კვლევამ აჩვენა, რომ ათიდან რვა ესპანელი (81,5%) ბედნიერია თავისი სამსახურით, რაც ერთ-ერთი საუკეთესო მაჩვენებელია ბოლო წლებში.
ამასთან ერთად, "ადეკოს" ცნობით, ყველაზე "ბედნიერები" საკუთარი სამსახურით ესპანეთის ჩრდილოეთ ნაწილში არიან.