ჯო ბაიდენის ადმინისტრაცია უკრაინისთვის 800 მილიონი დოლარის ღირებულების დამატებით დახმარებას ამზადებს
აშშ-ის პრეზიდენტის, ჯო ბაიდენის ადმინისტრაცია უკრაინისთვის ახალ, 800 მილიონი აშშ დოლარის ღირებულების დახმარებას ამზადებს, - ინფორმაციას Reuters-ი სხვადასხვა წყაროზე დაყრდნობით ავრცელებს.
ერთ-ერთი წყაროს ცნობით, ბაიდენმა შესაძლოა სპეციალური უფლება გამოიყენოს, რომელიც პრეზიდენტს აშშ-ის მარაგებიდან ჭარბი იარაღის გატანის ნებართვას ანიჭებს.
წყაროებმა, რომლებიც Reuters-ს ანონიმურობის პირობით ესაუბრნენ, განაცხადეს, რომ დახმარების ახალი პაკეტის შესახებ შესაძლოა განცხადება დღეს, ან მომავალ კვირაში გაკეთდეს. მათ არ გამორიცხეს, რომ დახმარების პაკეტის ღირებულება შესაძლოა გამოცხადებამდე კიდევ შეიცვალოს.
უკრაინაში რუსეთის შეჭრის დღიდან ვაშინგტონმა კიევის მთავრობას მილიარდობით დოლარის დახმარება გაუგზავნა.