იმერული ხაჭაპურის მომზადება 6,24 ლარი ჯდება - რა ინგრედიენტები გაძვირდა/გაიაფდა აპრილში
2024 წლის აპრილში სტანდარტული მოცულობის ერთი იმერული ხაჭაპურის მომზადების საშუალო ღირებულებამ 6,24 ლარს შეადგინა, რაც გასული წლის იმავე პერიოდთან შედარებით, 4%-ით არის გაზრდილი - ამის შესახებ ინფორმაციას ISET აქვეყნებს.
მიუხედავად იმისა, რომ წლიურ ჭრილში ფასი გაზრდილია, უკვე მეორე თვეა იმერული ხაჭაპურის მომზადების ღირებულება მცირდება. მაგალითისთვის, აპრილში მარტთან შედარებით 2.4%-ით არის ფასი შემცირებული - მარტში იმერული ხაჭაპურის მომზადებისთვის 6.4 ლარი გვჭირდებოდა.
2024 წლის აპრილში, მარტთან შედარებით, ქალაქების ჭრილში კლება დაფიქსირდა ბათუმში (5.9%-ით), ქუთაისსა (4.9%-ით) და თბილისში (-3,7%-ით), ხოლო თელავში ფასები 4%-ით გაიზარდა.
აპრილში წლიურად ფასები გაზრდილია ხაჭაპურის მომზადებისთვის საჭირო ყველა ინგრედიენტზე:
- კარაქი (+15.6%)
- საფუარი (+15.3%)
- რძე (+12.1%)
- კვერცხი (+3.2%)
- ყველი (+2.2%)
- ფქვილი (+0.4%)
ხოლო ბოლო ერთი თვის ჭრილში ინგრედიენტების ფასები, კარაქისა (+1.1%-ით) და ფქვილის (+0.7%-ით) გარდა, შემცირებულია:
- ყველი (-4,1%)
- საფუარი (-1,2%)
- კვერცხი (-1,1%)
- რძე (-0,7%)
კვლევაში აღნიშნულია, რომ მარხვის პერიოდის დაწყებამ შესაძლოა, ხელი შეუწყო ყველსა და რძის პროდუქტებზე ფასების შემცირებას, რადგან ამ პერიოდში მოთხოვნა მცირეა.
