საერთაშორისო ტურიზმი პანდემიამდელ დონეს ჯერ ვერ დაუბრუნდა
2022 წელს მსოფლიოში 900 მილიონზე მეტი ტურისტული მგზავრობა დაფიქსირდა, ეს კი ორჯერ ნაკლებია 2019 წლის, პანდემიამდელ დონეზე. ამის შესახებ ინფორმაციას გაეროს მსოფლიოს ტურისტული ორგანიზაცია UNWTO ავრცელებს.
მათივე ცნობით, პანდემიამდელ 2019 წლის დონემდე 2022 წელს ტურიზმი მხოლოდ 63%-ით აღდგა. ამასთან, სხვადასხვა რეგიონებში აღდგენის პროცესი სხვადასხვა ტემპით მიმდინარეობს.
„ყველაზე მაღალი ზრდა ფიქსირდება ახლო აღმოსავლეთში - აქ საერთაშორისო ტურიზმი 2019-თან შედარებით აღდგენილია 83%-ით. ეს განპირობებულია როგორც EXPO-ს გამართვით, ასევე კატარში ფეხბურთის მსოფლიო ჩემპიონატის გამართვით. მეორე ადგილზეა ევროპა, სადაც მაჩვენებელი 80%-ს აღწევს. აფრიკასა და ამერიკაში აღდგენის მაჩვენებელია 65%. აზია-წყნარი-ოკეანის რეგიონში კი მხოლოდ 23%“ - აღნიშნავს UNWTO.
ორგანიზაციის ხელმძღვანელის ზურაბ პოლოლიკაშვილის განცხადებით, ბევრი იქნება დამოკიდებული ჩინელი ტურისტების მოგზაურობის აღდგენაზე, ვინაიდან ჩინეთში 2020 წლამდე იყო უდიდესი ბაზარი მსოფლიოში გასვლითი ტურიზმის კუთხით. კერძოდ, მათი დაბრუნება მნიშვნელოვან დადებით გავლენას მოახდენს მეზობელ აზიურ ქვეყნებზეც.
ამასთან, ორგანიზაციის შეფასებით ცალკეულ მიმართულებებზე ტურიზმიდან მიღებულმა შემოსავლებმა გადააჭარბა პანდემიამდელ დონეს: მაგალითად, თურქეთში - 40%-ით, რუმინეთში - 25%-ით, მექსიკაში და პორტუგალიაში 15% და 13%-ით.
