გიორგი ქადაგიძე: გამოსავალი ე.წ. მეორე თაობის რეფორმებში და არაპოპულარულ რთულ გადაწყვეტილებებშია

საქართველოს ეროვნული ბანკის პრეზიდენტი, გიორგი ქადაგიძე მიიჩნევს, რომ გამოსავალი არის ე.წ. მეორე თაობის რეფორმებში და ასევე არაპოპულარულ რთულ გადაწყვეტილებებში, რომელიც აუცილებლად არის მისაღები.

ამის შესახებ გიორგი ქადაგიძემ დღეს ჟურნალისტებს განუცხადა, თუმცა რას გულისხმობდა იგი ე.წ. მეორე თაობის რეფორმებში და რთულ გადაწყვეტილებებში, არ დაუკონკრეტებია. როგორც ქადაგიძემ ჟურნალისტებს განუცხადა, ამ ყველაფერზე ის ისაუბრებს პარლამენტში, როდესაც ყოველწლიური ანგარიშით წარსდგება.

რაც შეეხება ვიცე-პრემიერის, ეკონომიკისა და მდგრადი განვითარების მინისტრ, გიორგი კვირიკაშვილის განცხადებას, რომლის თქმითაც, ის ეროვნული ბანკის ადგილას რეფინანსირების განაკვეთს კიდევ უფრო გაზრდიდა, ქადაგიძემ აღნიშნა, რომ მონეტარული ინსტრუმენტებით და ეროვნულ ბანკში გასაღების ძიება ფუნდამენტურ პრობლემებზე, რომელიც დაკავშირებულია უცხოური ვალუტის ნაკლებ შემოდინებასთან, წორი არ არის. "ჩვენ ვახორციელებთ ერთადერთ სწორ პოლიტიკას, რომელიც არის შესაძლებელი განვახორციელოთ იმ ვითარებასა და იმ გარე შოკების პირობებში, რომელიც ჩვენ გვაქვს და გამოსავალი არის ე.წ. მეორე თაობის რეფორმებში, ასევე ხშირ შემთხვევაში არაპოპულარულ რთულ გადაწყვეტილებებში, რომელიც აუცილებლად არის მისაღები. ეს გადაწყვეტილებები აუცილებლად უნდა იქნას მიღებული და ამაში კონკრეტულად რას ვგულისხმობთ, მომდევნო კვირიდან პარლამენტში გამოსვლის დროს გვექნება დეტალური საუბარი", - განაცხადა ქადაგიძემ.

მისივე თქმით, იგი მთავრობის განცხადებების შეფასებისგან ყოველთვის იკავებდა თავს, თუმცა ეს გამოსვლა და წლიური ანგარიში, რომლის განხილვაც მომდევნო კვირიდან დაიწყება პარლამენტში, ეროვნული ბანკის პრეზიდენტის რანგში მისი ბოლო წლიური ანგარიშია. "გვექნება შესაძლებლობა, რომ ყველანაირი პოლიტიკური კონტექსტის გარეშე ვისაუბროთ როგორც ბევრ მიმართულებებზე, ასევე მიზეზებზე, მაგრამ რაც მთავარია გამოსავალზე, რადგან დღეს ჩვენს მოსახლეობას, ქვეყანას, მიზეზების განხილვაზე გაცილებით უფრო აინტერესებს კონკრეტული გადაწყვეტილებები, რომლებიც მათ ყოველდღიურ ყოფას შეეხება, რომელიც მათ ყოველდღიურ სოციალურ პირობებს გააუმჯობესებს. ამიტომ, ჩემი აზრით, დღეს ჩვენ უნდა ვმსჯელობდეთ გამოსავლის გზებზე, იმ პერსპექტივებზე, რომლის შედეგადაც მივიღებთ გაცილებით უკეთეს სურათს, განსხვავებით მიზეზებზე საუბრისგან და, რა თქმა უნდა, იმ განცხადებებისგან, რომელსაც მე ვისმენ", - განაცხადა ქადაგიძემ.

კითხვაზე, თუ არის ცნობილი ზუსტი თარიღი, როდის წარსდგება იგი პარლამენტის წინაშე წლიური ანგარიშით, ქადაგიძემ აღნიშნა, რომ თარიღი ცნობილი არ არის, თუმცა ეს იქნება მომავალ კვირაში. "იმედი მაქვს, რომ საუბრის ძირითადი აქცენტი იქნება გამოსავლის ძიებაზე და იმ რეფორმებზე, რომელიც ჩვენმა ქვეყანამ უნდა გაატაროს", - აღნიშნა ქადაგიძემ.