ახალაშენებულ ბინებზე მოთხოვნა გაიზარდა, მეორადზე კი შემცირდა
საცხოვრებელი უძრავი ქონების ტრანზაქციებში გარკვეული ცვლილებებია. თუკი აქამდე ძირითადი მოთხოვნა ძველ, საბჭოთა პერიოდში აშენებულ საცხოვრებელ ბინებზე მოდიოდა, წელს სურათი მკვეთრად შეიცვალა.
საერთაშორისო კვლევითი კომპანიის Colliers International-ის მიერ ჩატარებული კვლევების თანახმად, 2015 წლის პირველ ნახევარში წინა წელთან შედარებით ძველ ბინებზე მოთხოვნა 15%-ით შემცირდა, ხოლო ახალაშენებულ ბინებზე მოთხოვნა 29%-ით გაიზარდა.
მთლიანობაში კომპანიის მიერ ჩატარებული კვლევა 2013-2015 წლებს მოიცავს. ამგვარად, 2013 წელს უძრავ ქონებაში განხორციელებულმა ტრანზაქციების ჯამურმა რაოდენობამ 7 745 00 ერთეული შეადგინა. აქედან, ძველ ბინებზე - 6 099 00, ხოლო ახალაშენებულზე - 1 646 00 ერთეული. 2014 წელს ტრანზაქციების ჯამურმა რაოდენობამ 8 514 00 შეადგინა, ხოლო ძველ ბინებზე - 6 798 00, ახალაშენებულზე - 1 716 00 ერთეული. 2015 წელს ტრანაზაქციების ჯამური რაოდენობა - 7 999 00, ძველ ბინებზე - 5 778 00, ახალაშენებულზე - 2 221 00 ერთეული შეადგინა.
რატომ გაიზარდა მოთხოვნა ახალ ბინებზე? რა გავლენას იქონიებს საბერძნეთის კრიზისი ქართული უძრავის ქონების ბაზარზე და რამდენად უარყოფითი იქნება ეს შედეგები?
Colliers International-ის მმართველი დირექტორის, ირაკლი კილაურიძის თქმით, ცალსახად ერთი კონკრეტული მიზეზის გამოყოფა, თუ რატომ გაიზარდა ახალაშენებულ ბინებზე მოთხოვნა, ძნელია.
„მიზეზი ბევრი შეიძლება იყოს. შეიძლება ითქვას, რომ ერთდროულად რამდენიმე ბინა ექსპლუატაციაში შევიდა და დარეგისტრირდა. ასევე, ზოგიერთმა დეველოპერმა კომპანიამ ფასდაკლების აქციები გამოაცხადა, ბინის შეძენა ეროვნულ ვალუტაშია შესაძლებელი, მომხმარებელს შიდა განვადებებს სთავაზობენ და სხვა. ჩვენი კვლევები გაყიდვებს ეყრდნობა. ამიტომ, გადაჭრით იმის თქმა, რომ ადრე ნაყიდი ბინები ახლა შევიდა ექსპლუატაციაში თუ ახლა იყიდეს და მაშინვე დაარეგისტრირეს, გაჭირდება. მაგალითად, 2013 წელთან შედარებით 2014 წელს ახალაშენებულ ბინებზე მოთხოვნა 4%-ით გაიზარდა, ხოლო წელს 29%-ით. პრაქტიკულად, ეს პირველი შემთხვევაა, როცა ბაზარზე ძველ ბინებზე მოთხოვნა შემცირდა, ხოლო ახალაშენებულზე გაიზარდა. რა თქმა უნდა, ეს ყველაფერი ლარის დევალვაციასთან კავშირშია. როგორც ჩანს, დეველოპერმა კომპანიებმა ამას სტიმულირება გაუკეთეს და მომხმარებელს მისთვის მისაღები პირობები შესთავაზეს, რაც ძველი ბინების შემთხვევაში წამგებიანი აღმოჩნდა. ის, ვინც ძველი ბინის ყიდვას ფიქრობდა, გადაიფიქრა და ახალაშენებული ბინით დაინტერესდა,“ - ამბობს ირაკლი კილაურიძე.
რაც შეეხება საბერძნეთის კრიზისის შესაძლო გავლენას ქართულ უძრავი ქონების ბაზარზე, კილაურიძის თქმით, ეს მოსალოდნელია, რადგან გზავნილების მეტი წილი სწორედ საბერძნეთზე მოდის.
„მოგეხსენებათ, გზავნილების ყველაზე დიდი წილი რუსეთიდან და საბერძნეთიდან შემოდის. შედარებით ნაკლებად აშშ-სა და ევროპის დანარჩენი ქვეყნებიდან. ორივე ქვეყანაში ძალიან რთული სიტუაციაა, რასაც სტატისტიკაც ადასტურებს - გზავნილების ნაკადი მკვეთრად შემცირდა. რა თქმა უნდა, გავლენა აქვს. ემიგრანტების დიდი ნაწილი ბინებს შემოსავლების დადასტურების გარეშე ყიდულობს: ბინის ღირებულების 20-205%-ს წინასწარ იხდიან, შემდეგ ამ ბინას ბანკში ჩადებენ და ყოველთვიურად პროცენტს იხდიან. წარმოიდგინეთ, რა მოხდება თუკი ყოველთვიურად თანხას ვერ გამოგზავნის და კრედიტს ვერ დაფარავს? თავის მხრივ, ბანკები არასახარბიელო მდგომარეობაში აღმოჩნდებიან, ხოლო მომხმარებელმა შესაძლოა, ბინა დაკარგოს. ამდენად, საბერძნეთის კრიზისი პირდაპირ კავშირშია ჩვენს ბაზართან“, - დასძინა კილაურიძემ.
სალომე გოგოხია