სოფლის მეურნეობის სამინისტროს შპს "საქართველოს მელიორაცია" ქვემო ქართლში, მარნეულის მუნიციპალიტეტში ცისკრისა და ბაგრატის სარწყავი სისტემების რეაბილიტაციას ახორციელებს.
შპს "საქართველოს მელიორაციის" ინფორმაციით, პროექტის ფარგლებში მაგისტრალური არხების I და სხვა რიგის გამანაწილებლების და შიდასამეურნეო ქსელის რეაბილიტაცია ჩატარდება. დაგეგმილია ცისკრის, ბაგრატისა და ბოლო არხების წმენდა, დაზიანებული მოპირკეთების დემონტაჟი, ახალი მოპირკეთების მოწყობა მონოლითური რკინაბეტონით; არსებული მილხიდების შეკეთება და ახალი მილხიდების მოწყობა; ტიპიური წყალგამშვები კვანძების მოწყობა.
"რეაბილიტაციის შედეგად 4 სოფლის (ყაჩაღანი, კასუნლო, ულაშლო, აღმამედლუ) 820 ჰა სასოფლო სამეურნეო მიწის ფართობი გასარწყავდება, რითაც 450 მოსახლე ისარგებლებს. პროექტის ღირებულება 3464000 ლარია. სამუშაოები გასულ წელს დაიწყო და 2015 წლის ბოლოს დასრულდება", - ნათქვამია განცხადებაში.
"საქართველოს მელიორაცია" დღეის მდგომარეობით, რწყვის სეზონის პარალელურად, ქვემო ქართლის რეგიონში 7 ობიექტზე სარეაბილიტაციო ღონისძიებებს ახორციელებს.