ინფორმაციის თავისუფლების განვითარების ინსტიტუტის (IDFI) ინფორმაციით, რვა საჯარო დაწესებულებას მიმოწერა ჰქონდა საქართველოს ფეხბურთის ფედერაციასთან, სადაც ფედერაციას უეფას სუპერთასის მატჩზე დასასწრები ბილეთების შეძენაში დახმარებას სთხოვდნენ.
IDFI-ს ცნობით, საჯარო დაწესებულებები ითხოვდნენ დახმარების გაწევას მათი თანამშრომლებისათვის, თანამშრომლების კუთვნილი სახსრებით უეფა-ს სუპერთასის მატჩზე დასასწრები ბილეთების შეძენაში. აღნიშნულ რვა უწყებას ფეხბურთის ფედერაციის მიერ შესასყიდად სულ გადაეცათ 710 ბილეთი, აქედან ყველაზე მეტი - ქალაქ თბილისის მერიას და საქართველოს პარლამენტს. არასამთავრობო ორგანიზაციის ცნობით, ფეხბურთის ფედერაციას დახმარების თხოვნით მიმართა: თბილისის მერია - 240 ბილეთი, საქართველოს პარლამენტი - 200 ბილეთი, პრეზიდენტის ადმინისტრაცია - 50 ბილეთი, იუსტიციის სამინისტრო - 50 ბილეთი, საგარეო საქმეთა სამინისტრო - 50 ბილეთი, რეგიონული განვითარებისა და ინფრასტრუქტურის სამინისტრო - 50 ბილეთი, სოფლის მეურნეობის სამინისტრო - 50 ბილეთი, კულტურისა და ძეგლთა დაცვის სამინისტრო - 20 ბილეთი.
ინფორმაციის თავისუფლების განვითარების ინსტიტუტის ინფორმაციით, ფინანსთა, შინაგან საქმეთა და ეკონომიკისა და მდგრადი განვითარების სამინისტროებს პასუხი IDFI-ს მოთხოვნებზე დღემდე არ მიუწოდებია.