დიმიტრი ქუმსიშვილმა კოხტა-მიტარბის ახალი საბაგირო გზის მშენებლობა დაათვალიერა
საქართველოს ეკონომიკისა და მდგრადი განვითარების მინისტრი, დიმიტრი ქუმსიშვილი დღეს დაბა ბაკურიანს ეწვია და მიმდინარე ინფრასტრუქტურული სამუშაოები დაათვალიერა.
ეკონომიკის სამინისტროს ინფორმაციით, კოხტას მთაზე მონტაჟდება ახალი საბაგირო შუალედური სადგურით, რომლის მშენებლობაც დასრულდება 2015 წლის ბოლოს, მის მიმდებარე ტერიტორიაზე კი აშენდება 500 საწოლზე გათვლილი ტურისტული ინფრასტრუქტურა - სასტუმროები, აპარტოტელები, კოტეჯები, კვებისა და გასართობი ობიექტები. მათივე ინფორმაციით, დაბა მიტარბის ტერიტორიაზე დამონტაჟდება ორი საბაგირო და ერთი საჩოჩიალო, რომლის მშენებლობაც 2016 წლის ბოლოს დასრულდება, მიმდებარე ტერიტორიაზე აშენდება 300 საწოლზე გათვლილი ტურისტული ინფრასტრუქტურა - სასტუმროები, აპარტოტელები, კოტეჯები, კვებისა და გასართობი ობიექტები, რაც ხელს შეუწყობს სამთო-სათხილამურო ტურიზმის განვითარებას საქართველოს ისტორიულ კურორტ ბაკურიანში.
კოხტისა და მიტარბის მთაზე დამონტაჟდება მსოფლიოში ერთ-ერთი წამყვანი მწარმოებლის "დოპელაიერის" საბაგირო. პროექტი ხორციელდება სახელმწიფოსა და კერძო სექტორის პარტნიორობით. კოხტა, მიტარბის საბაგიროების მშენებლობის პროექტს სახელმწიფოს მთავრობა 48 მილიონი ლარით დააფინანსებს, კერძო ინვესტორი კი 70 მილიონი ლარს გამოყოფს. რაც ერთ-ერთი მსხვილი ინვესტიცია იქნება სამთო ტურიზმის აღორძინების კუთხით.
საბაგირო გზის სამშენებლო სამუშაოებს ახორციელებს კომპანია "ბლექ სი გრუპი". კომპანიის გენერალურმა დირექტორმა ამირან მამუჭაძემ ეკონომიკისა და მდგრადი განვითარების მინისტრს დღეს სამუშაოების მიმდინარეობის კუთხით არსებული ვითარება პირადად გააცნო. "ეს პროექტი ბატონი გიორგი კვირიკაშვილის ინიციატივით იყო დაწყებული. მას უდიდესი წვლილი აქვს შეტანილი და დიდი მადლობა ინიციატივისთვის", - განაცხადა ქუმსიშვილმა. მისი განცხადებით, სამუშაოები ინტენსიურად მიმდინარეობს და პრაქტიკულად, ზედა სადგურზე ბეტონის საძირკვლის სამუშაოები უკვე შესრულებულია. ასევე შემოსულია ის მოწყობილობა-დანადგარები, რომლებიც საბაგიროს მოსაწყობადააა საჭირო. მინისტრის ინფორმაციით, სამუშაოები დათქმულ ვადებში ხორციელდება და დეკემბრის ბოლოს კოხტა-მიტარბის ტერიტორიაზე უკვე ახალი საბაგირო გზა დაიწყებს ფუნქციონირებას.