საავტომობილო გზების დეპარტამენტის ინფორმაციით, კასპის მუნიციპალიტეტის სამი სოფლის მოსახლეობა რეაბილიტირებული გზით ისარგებლებს. როგორც საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტში იუწყებიან, საავტომობილო გზების დეპარტამენტი კასპის მუნიციპალიტეტში, ახალქალაქი-რკონის საავტომობილო გზის 4 კმ-იანი მონაკვეთის რეაბილიტაციას ახორციელებს. მათივე ცნობით, სარეაბილიტაციო მონაკვეთი კასპის მუნიციპალიტეტის სოფლებზე - ახალქალაქზე, გარიყულასა და ერთაწმინდაზე გადის და ერთაწმინდის ტაძრის კომპლექსთან სრულდება.
პროექტი ითვალისწინებს: ასფალტ-ბეტონის საფარის დაგების, კიუვეტების, მოსახლეობის ეზოებში შესასვლელების, ადგილობრივ გზებთან მიერთებების, საგზაო ნიშნებისა და საზოგადოებრივი ტრანსპორტის გაჩერებების მოწყობას. დეპარტამენტის ინფორმაციით, ამჟამად, გზის აღნიშნულ მონაკვეთზე, რკინა-ბეტონის ღარების, კიუვეტების, საგზაო ნიშნებისა და ბოგირების მოწყობის სამუშაოები მიმდინარეობს. 3.5 კილომეტრიან მონკვეთზე საგზაო საფარი უკვე დაიგო. პროექტი, რომლის ღირებულება 2 478 700 ლარია, მსოფლიო ბანკის დაფინანსებით ხორციელდება და მასზე 40 ადამიანია დასაქმებული. სარეაბილიტაციო სამუშაოების დამთავრება 2016 წელს იგეგმებოდა, თუმცა, ინტენსიური მუშაობის შედეგად, მიმდინარე წლის ბოლოს დასრულდება.