გიგლა აგულაშვილი - კვლევებმა აჩვენა, რომ ჰაერის ძირითადი დამაბინძურებელი წყარო არის ავტომობილები
კვლევებმა აჩვენა, რომ ჰაერის ძირითადი დამაბინძურებელი წყარო არის ავტომობილები, - ამის შესახებ გარემოსა და ბუნებრივი რესურსების დაცვის მინისტრმა გიგლა აგულაშვილმა მთავრობის დღევანდელ სხდომაზე განაცხადა.
"რამდენიმე ქალაქში, მათ შორის თბილისში ჩატარებულმა ჰაერის სინჯების კვლევებმა აჩვენა, რომ ძირითადი დამაბინძურებელი წყარო არის ავტომობილები. ეს არის ძირითადად დამოკიდებული ავტოსატრანსპორტო პარკის სიძველეზე. საწვავის ხარისხთან ერთად პრობლემას წარმოადგენს გამონაბოლქვში იმ ტოქსიკური აირების შემცველობა, რომელიც არასრული წვის შედეგია", - განაცხადა აგულაშვილმა და აღნიშნა, რომ მხარს უჭერს ავტოსატრანსპორტო პარკის ეტაპობრივად გაუმჯობესებას და გაჯანსაღებას.
მინისტრის განცხადებით, ჰაერის სინჯების კვლევები გაგრძელდება და სისტემატიური ხასიათი ექნება საქართველოს მასშტაბით.
"კვლევებს ვაგრძელებთ. დღევანდელი მონაცემებით, თბილისში ჩატარებული კვლევის შედეგად დადგინდა, რომ ზოგიერთ უბანში ჰაერის ხარისხში მაჩვენებლები ევროსტანდარტის შესაბამისად, საშუალო დონისაა და იმისათვის, რომ ვითარება გაუმჯობესდეს, ჩვენ გვჭირდება მივიღოთ ზომები და ეტაპობრივად შევცვალოთ ჩვენი ავტოპარკი", - განაცხადა გიგლა აგულაშვილმა.
გარემოს დაცვის მინისტრმა ყურადღება გაამახვილა საწვავის ხარისხზე და აღნიშნა, რომ ამ კუთხით მთავრობის მიერ დადგენილი ნორმები ცალკეულმა იმპორტიორებმა უკვე შეასრულეს და ცალკეული სახეობის საწვავი, რომელიც იყიდება, უკვე შეესაბამება ევრო 5-ის სტანდარტს.