"საქართველოს ბანკის" დიჯიპასის მობილური აპლიკაციით სარგებლობა მომხმარებელს უფასოდ შეუძლია

"საქართველოს ბანკის" დიჯიპასის მობილური აპლიკაციით სარგებლობა მომხმარებელს სრულიად უფასოდ შეუძლია.

როგორც "საქართველოს ბანკში" აცხადებენ, მომხმარებელს უკვე აქვს შესაძლებლობა დისტანციურ არხებში შესასვლელად და ამავე არხებში ოპერაციების შესასრულებლად მიიღოს დაგენერირებული კოდები უსაფრთხოდ და სწრაფად, დიჯიპასის აპლიკაციის მეშვეობით საკუთარ მობილურ ტელეფონში.

"საქართველოს ბანკის" განმარტებით, აპლიკაციით სარგებლობისთვის, მომხმარებელმა მობილურ ტელეფონში უნდა გადმოტვირთოს BOG DIGIPASS აპლიკაცია, სრულიად უფასოდ. BOG DIGIPASS აპლიკაციით სარგებლობას მომხმარებელი შეძლებს როგორც საქართველოში, ასევე საზღვარგარეთ როუმინგის ჩართვის გარეშე, რადგან ერთჯერადი კოდების მისაღებად ინტერნეტკავშირი არ არის საჭირო. BOG DIGIPASS აპლიკაციით მიღებული ერთჯერადი კოდები უზრუნველყოფს მომხმარებლის მიერ ინტერნეტბანკით, მობაილბანკითა და ტელეფონბანკით შესრულებული ოპერაციების უსაფრთხოებას და სისწრაფეს, რადგან ხსენებული აპლიკაციის მეშვეობით ერთჯერადი კოდი წამიერად გენერირდება.

"BOG DIGIPASS აპლიკაციის გააქტიურება ძალიან მარტივია. აპლიკაციის გადმოწერის შემდეგ, მომხმარებელმა უნდა გახსნას იგი, აირჩიოს "აპლიკაციის გააქტიურება" და შეიყვანოს მომხმარებლის სახელი, რომელსაც იყენებს დისტანციური არხებით სარგებლობის დროს. აპლიკაციის აქტივაციის კოდის მისაღებად მომხმარებელმა ერთჯერადად უნდა დარეკოს "საქართველოს ბანკის" სატელეფონო მომსახურების ცენტრში (2 444 444), ან ეწვიოს ნებისმიერ სერვისცენტრს, ან ინტერნეტბანკს (www.ibank.ge; www.eonline.ge), ან გამოიყენოს დიჯიპასის მინიმოწყობილობა. მიღებული ერთჯერადი კოდის შესაბამის ველში შეყვანისას აპლიკაცია გააქტიურდება", - აცხადებენ "საქართველოს ბანკში".

მათივე ინფორმაციით, გააქტიურებული BOG DIGIPASS აპლიკაციით ერთჯერადი კოდის მიღებაც ძალიან მარტივია. მომხმარებელმა უნდა გახსნას აპლიკაცია, დააჭიროს "ერთჯერად კოდს" და ეკრანზე გამოჩნდება კოდი, რომლის გამოყენების ვადა 3 წუთია. BOG DIGIPASS აპლიკაციით კოდების მიღება შესაძლებელია მსოფლიოს ნებისმიერ წერტილში. გარდა ამისა, მომხმარებელს აღარ მოუწევს მინიმოწყობილობის თან ტარება, რადგან აპლიკაცია მობილურში ექნება გადმოწერილი. BOG DIGIPASS აპლიკაციის გადმოწერა შეუძლია iPhone-ის მფლობელს, თუ დარეგისტრირებულია App Store-ის მომხმარებლად, ასევე Android-ის მფლობელს, თუ დარეგისტრირებულია Google Play-ს მომხმარებლად.

დამატებითი ინფორმაცია ხელმისაწვდომია ვებგვერდზე www.sb.ge.