"საპარტნიორო ფონდში" YTONG-ის ენერგოეფექტური ბლოკის ქარხნის პროექტი განიხილება

"საპარტნიორო ფონდში" Ytong -ის ენერგოეფექტური ბლოკის ქარხნის პროექტი განიხილება. "საპარტნიორო ფონდის" ინფორმაციით, პროექტზე ფონდი ქართული კომპანია Ytong caucasus-სა და გერმანულ კომპანია Xella-თან ერთად მუშაობს.

როგორც "საპარტნიორო ფონდში" აღნიშნავენ, ქარხნის მშენებლობა თბილისის მიმდებარე ტერიტორიაზე იგეგმება. პროექტის თანახმად, ქარხნის მშენებლობა 2016 წლის ბოლომდე უნდა დასრულდეს, ხოლო პირველი სერტიფიცირებული პროდუქციის გამოშვება 2017 წლის დასაწყისში იგეგმება.

Ytong-ის ენერგოეფექტური აირბლოკი სამშენებლო დანიშნულებისაა. ის არის მაღალტექნოლოგიური ინოვაციური პროდუქტი, რომელიც სრულად შეესაბამება ევროპულ სამშენებლო სტანდარტებს და არის აბსოლუტურად ეკოლოგიურად სუფთა, რაც დასტურდება ევროპული ინსტიტუტების მიერ გაცემული სერტიფიკატებით.

მიღებული ექსკლუზიური ლიცენზიის თანახმად, პროდუქციის ნაწილი საქართველოში გაიყიდება, ხოლო დარჩენილი ნაწილი ექსპორტზე გავა აზერბაიჯანში, სომხეთსა და რუსეთის სამხრეთ ნაწილში.

როგორც "საპარტნიორო ფონდის" საინვესტიციო დეპარტამენტის უფროსი საინვესტიციო ოფიცერი ნინო ჩოლოყაშვილი აცხადებს, Ytong-ის ენერგოეფექტურ ბლოკს სხვა სამშენებლო მასალებთან შედარებით რიგი უპირატესობები გააჩნია, მისი თბოგამტარობა 5-ჯერ უფრო უკეთესია ბეტონის ბლოკის ანალოგიურ მაჩვენებელთან. ასევე იგი არის ბევრად უფრო მსუბუქი, რაც საშუალებას იძლევა მნიშვნელოვნად შემცირდეს შენობა-ნაგებობების მშენებლობაში გამოსაყენებელი არმატურის რაოდენობა და საგრძნობლად დაჩქარდეს სამშენებლო პროცესი.

"გარდა ამისა, მნიშვნელოვანია ის ფაქტორიც, რომ ბლოკის წარმოებისთვის საჭირო ნედლეული საქართველოში მოიპოვება, პროექტის განხორციელება იმ კუთხითაც არის მიმზიდველი, რომ Ytong-ის აირი ბლოკით აშენებული შენობების მაღალი თბოიზოლაციური მაჩვენებლიდან გამომდინარე, შესაძლებელია შენობის გათბობა-გაგრილებაზე გაწეული კომუნალური ხარჯების საგრძნობლად შემცირება", აცხადებს ნინო ჩოლოყაშვილი.

პროექტის საინვესტიციო მოცულობა 13,5 მლნ აშშ დოლარია. პროექტი განხილვის პროცესშია და ამჟამად პარტნიორებს შორის მოლაპარაკებები მიმდინარეობს.