დიმიტრი ქუმსიშვილი - ჩვენ ადგილობრივი წარმოება არ გაგვაჩნდა, რაც მოქმედი ხელისუფლების ბრალი არ არის
ჩვენ ადგილობრივი წარმოება არ გაგვაჩნდა და ეს მოქმედი ხელისუფლების ბრალი ნამდვილად არ არის, - ამის შესახებ ეკონომიკისა და მდგრადი განვითარების მინისტრმა დიმიტრი ქუმსიშვილმა გადაცემა "არჩევანში" განაცხადა. მისივე თქმით, დოლართან მიმართებაში ევროც გაუფასურდა, თუმცა ევროკავშირის ეკონომიკისთვის ეს გამოწვევა იყო, რაც საქართველოს შემთხვევაში ასე არ აღმოჩნდა.
"ევრო დოლართან მიმართებაში გაუფასურებულია 2014 წლის ნოემბრიდან 15,29 პროცენტით. სინამდვილეში ეს ევროკავშირისთვის კონკურენტული უპირატესობის მოპოვება იყო, იმიტომ, რომ მათი პროდუქცია უფრო რეალიზებადი გახდა, თუმცა ჩვენს ქვეყანაში ეს ასე არ არის, რადგან ჩვენ ადგილობრივი წარმოება არ გვაქვს და არავინ ზრუნავდა ადგილობრივი წარმოების განვითარებაზე - ეს კი ამ ხელისუფლების ბრალი არ არის. ადგილობრივი წარმოების განვითარებას დრო სჭირდება და ამისათვის ჩვენ რამდენიმე პროექტი დავიწყეთ, მათ შორის "აწარმოე საქართველოში", რომელმაც ქვეყანაში 390 მილიონი დოლარის საინვესტიციო პოტენციალი შექმნა", - განაცხადა ქუმსიშვილმა.