მთავრობა ონლაინ-სესხებთან დაკავშირებით საკანონმდებლო ინიციატივაზე მუშაობს
მთავრობა ონლაინ-სესხების საკითხზე საკანონმდებლო ინიციატივაზე მუშაობს. როგორც მთავრობის ადმინისტრაციაში აცხადებენ, შესაბამისი საკითხი ეკონომიკური საბჭოს დღევანდელ სხდომაზე განიხილეს, რომელსაც პრემიერ-მინისტრი გიორგი კვირიკაშვილი ხელმძღვანელობდა.
”ეკონომიკურმა საბჭომ დღევანდელ სხდომაზე იმსჯელა ონლაინ-სესხების და მასთან დაკავშირებული ურთიერთობების სამართლებრივ ჩარჩოებში მოქცევის მექანიზმის შემუშავებაზე. ამ მიზნით, მთავრობა შესაბამის საკანონმდებლო ინიციატივაზე მუშაობს”, - აცხადებენ ადმინისტრაციაში.
მათივე ინფორმაციით, ეკონომიკური საბჭოს დღევანდელ სხდომაზე საუბარი იყო ასევე საქართველოს ეკონომიკაში არსებულ პოზიტიურ ტენდენციებზე, ტურიზმის პოზიტიურ დინამიკასა და მაკროეკონომიკურ პარამეტრებზე.
მაკროეკონომიკური პარამეტრების შესახებ სხდომაზე ეროვნული ბანკის ვიცე-პრეზიდენტებმა, არჩილ მესტვირიშვილმა და ოთარ ნადარაიამ ისაუბრეს.
”აღინიშნა ის პოზიტიური ტენდენციები, რომელიც ბოლო პერიოდში საქართველოს ეკონომიკაში შეინიშნება. განსაკუთრებით გაესვა ხაზი ტურიზმის მზარდ დინამიკას, რაც ქვეყნის ეკონომიკურ განვითარებაში მნიშვნელოვან როლს ასრულებს”, - განმარტავენ მთავრობის ადმინისტრაციაში.