პეკინში ქართული ღვინისა და ჩინურ-ქართული ფოლკლორის დღე აღინიშნა

ჩინეთის სახალხო რესპუბლიკის დედაქალაქ პეკინში ქართული ღვინისა და ჩინურ-ქართული ფოლკლორის დღე „საქართველო - ღვინის სამშობლო, მეღვინეობის 8000-წლიანი უწყვეტი ტრადიცია“ აღინიშნა.

ღვინის ეროვნული სააგენტოს ინფორმაციით, ღონისძიება ღვინის ეროვნული სააგენტოს მხარდაჭერითა და ჩინეთში ქართული ღვინის პოპულარიზაციის ცენტრის ორგანიზებით გაიმართა.

მასზე მოწვეულ სტუმრებს კაფე Art Café Ku-მ უმასპინძლა. ჩინელ და ქართველ დელეგატებთან ერთად ღონისძიებას დაესწრო და სიტყვით გამოვიდა საქართველოს საგაგებო და სრულუფლებიანი ელჩი ჩინეთის სახალხო რესპუბლიკაში დავით აფციაური და ქართული ღვინის წარმომადგენელი ჩინეთში მაია ცქიტიშვილი.

სტუმრებს შორის იყვნენ პეკინის წამყვანი უნივერსიტეტების (Peking University, Renmin University და სხვა), ღვინის ინდუსტრიის, ხელოვნების სფეროს, ღვინის სპეციალიზირებული და სხვა მედია საშუალებების წარმომადგენლები.

სადეგუსტაციოდ წარმოდგენილი იყო ქართული ღვინის კომპანიების („თელედა“, „დუგლაძეების ღვინის კომპანია“, „კახური ღვინის მარანი“, „შალვინო“, „ტიფლისკი ვინნი პოგრები“, „მეღვინეობა ხარება“ და „თელავის ღვინის მარანი“) 30 სახეობის 100-მდე ბოთლი ღვინო. სტუმრებს შესაძლებლობა ჰქონდათ გაცნობოდნენ ჩინეთში მცხოვრები ქართველი მოქანდაკე-მხატვრის ალექსანდრე გელაშვილის შემოქმედებას.

ღონისძიება ჩინური და ქართული ფოლკლორითა და ცეკვებით წარიმართა, რომელიც ქართული და ჩინური კერძებისა და ქართული ღვინის დაგემოვნებით დასრულდა. ჩინურ ტრადიციულ საკრავზე (Guzheng) შესრულებული მუსიკა და ჩინური ფოლკლორული ცეკვები კორეის ანსამბლის მიერ იქნა შესრულებული, რომლის ორგანიზება პეკინის საერთაშორისო კულტურის განვითარების ორგანიზაციამ უზრუნველყო.

იხილეთ ვიდეო PALITRANEWS-ზე