დიმიტრი ქუმსიშვილი მექსიკის კონგრესის დელეგაციას შეხვდა
საქართველოს პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი მექსიკის კონგრესის დელეგაციას შეხვდა, რომელსაც საგარეო ურთიერთობათა კომიტეტის თავმჯდომარე გაბრიელა კუევას ბარონი ხელმძღვანელობს.
როგორც ეკონომიკისა და მდგრადი განვითარების სამინისტროში აცხადებენ, პირველმა ვიცე-პრემიერმა ისაუბრა საქართველოში მიმდინარე ეკონომიკურ მდგომარეობაზე, შეღავათიან საგადასახადო და სავაჭრო რეჟიმებსა და ხელსაყრელ საინვესტიციო გარემოზე.
სამინისტროს ინფორმაციით, შეხვედრაზე მხარეებმა განიხილეს საქართველო-მექსიკის სავაჭრო-ეკონომიკური ურთიერთობები და თანამშრომლობის შემდგომი განვითარების პერსპექტივები.
შეხვედრაზე გამოიკვეთა თანამშრომლობის პრიორიტეტული მიმართულებები, მათ შორის, სოფლის მეურნეობა, ტურიზმი, განახლებადი ენერგეტიკა, კინოწარმოება. მათივე ცნობით, მექსიკურმა მხარემ ინტერესი გამოხატა კინოინდუსტრიის წახალისების კომპონენტის მიმართ, რომელიც ქვეყანაში გადაღებებზე გაწეული კვალიფიციური ხარჯების 20%-დან 25%-მდე ანაზღაურებას გულისხმობს.
ასევე განსაკუთრებული ყურადღება გამახვილდა ორმხრივი ვაჭრობის განვითარების მიმართულებაზე, მათ შორის, მექსიკაში ქართული ღვინის ექსპორტის გაზრდასა და თანამშრომლობის გაღრმავებაზე მეღვინეობის სფეროში.
ეკონომიკის სამინისტროს ინფორმაციით, შეხვედრაზე მექსიკური მხარე გამოვიდა ინიციატივით, რომ უახლოეს მომავალში, მექსიკაში დაიგეგმოს საქართველოს პირველი ვიცე-პრემიერის ვიზიტი, რომლის დროსაც შედგება შეხვედრები მექსიკის უმაღლესი სამთავრობო და ბიზნეს წრეების წარმომადგენლებთან.
შეხვედრას ასევე დაესწრნენ საქართველოს ეკონომიკისა და მდგრადი განვითარების მინისტრის მოადგილეები, ქეთევან ბოჭორიშვილი და გენადი არველაძე, აგრეთვე მექსიკის ელჩი საქართველოში, მარტა ელენა ბარსენა კოკი.