ფოთში ცემენტის ახალი საწარმო გაიხსნა

პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი ფოთში, „საქართველოს ცემენტის კომპანიის“ კუთვნილი ქარხნის გახსნას დაესწრო , - ამის შესახებ ეკონომიკისა და მდგრადი განვითარების სამინისტროში განაცხადეს. 

როგორც სიტყვით გამოსვლისას, დიმიტრი ქუმსიშვილმა აღნიშნა, ქართულ ბაზარზე კიდევ ერთი ქარხანა იმუშავებს, რომელიც საერთაშორისო ხარისხის პროდუქციას აწარმოებს.

„დღეიდან ფოთში ცემენტის ახალი საწარმო ამუშავდება - ეს თავისთავად ძალიან მნიშვნელოვანი ფაქტია, თუმცა, კიდევ უფრო მახარებს, რომ „საქართველოს ცემენტის კომპანია“ ამ პროექტს ფრანგულ-შვეიცარულ კომპანია ,,ლაფარჟჰოლციმთან” თანამშრომლობით ახორციელებს. ეს ნიშნავს, რომ ქართულ ბაზარზე კიდევ ერთი ქარხანა იმუშავებს, რომელიც საერთაშორისო ხარისხის პროდუქციას აწარმოებს,“ - განაცხადა დიმიტრი ქუმსიშვილმა.

ეკონომიკის სამინისტროს ცნობით, „ლაფარჟჰოლციმი“ (Lafargeholcim) წარმოდგენილია მსოფლიოს 90 ქვეყანაში და ერთ-ერთი მთავარი მოთამაშეა ცემენტის, ინერტული მასალებისა და ბეტონის ბიზნესში. იგი ფლობს 2500-ზე მეტ ქარხანას მთელ მსოფლიოში.

პირველი ვიცე-პრემიერის განცხადებით, მნიშვნელოვანია, რომ სწორედ რეგიონებში გაიხსნას ახალი საწარმოები, ეს ნიშნავს მათთვის ახალ ეკონომიკურ პერსპექტივებს, ახალ ინვესტიციებს და რაც ასევე არანაკლებ მნიშვნელოვანია, ახალ სამუშაო ადგილებს ადგილობრივი მოსახლეობისთვის.

მისი ინფორმაციით, „საქართველოს ცემენტის კომპანიის“ ფოთის ქარხანაში 100-მდე ადამიანი დასაქმდება, რომელთა უდიდესი ნაწილი ადგილობრივი მოსახლე იქნება.

დიმიტრი ქუმსიშვილის განცხადებით, მნიშვნელოვანია, რომ კომპანია ეკოლოგიური ნორმების დაცვის საკითხს სერიოზულად მოეკიდა. შესაბამისად, ამ მიზნით ქარხანაში 11 ფილტრი დამონტაჟდა, რომელთა საშუალებითაც მოხდება ცემენტის წარმოების შედეგად გამოყოფილი მტვრის დაჭერა. ამ მიმართულებითაც კომპანია საერთაშორისო სტანდარტების შესაბამისად მუშაობს.

„ჩვენს ქვეყანაში დღესდღეობით არაერთი მსხვილი, მათ შორის რეგიონული მასშტაბის ინფრასტრუქტურული პროექტი ხორციელდება. ბუნებრივია, მათი მშენებლობის პროცესში მაღალი ხარისხის სამშენებლო მასალები უნდა იქნას გამოყენებული. დარწმუნებული ვარ, „საქართველოს ცემენტის კომპანიის“ მიერ წარმოებული პროდუქცია სწორედ მათ რიცხვში იქნება, წარმატებით მოძებნის და დაიკავებს საკუთარ ადგილს ქართულ ბაზარზე,“ - განაცხადა დიმიტრი ქუმსიშვილმა.

ქარხნის გახსნის ღონისძიების დასრულების შემდეგ, პირველმა ვიცე-პრემიერმა მედიის წარმომადგენლებთან ანაკლიის პორტის პრეზენტაციებზე ისაუბრა.

„ჩვენ გვაქვს ყოველდღე ახალი პრეზენტაციები, იწყება ახალი პროექტები. გუშინ ანაკლიის პორტის პრეზენტაციები გვქონდა, რამდენიმე დღის წინ პრემიერ-მინისტრმა გააკეთა ვრცელი პრეზენტაცია ქვეყნის სივრცით განვითარებაზე. ყოველივე ამას სჭირდება შესაბამისი სამშენებლო მასალების მიწოდება და სწორედ ასეთი საწარმოები გახდებიან ამ პროექტების მიმწოდებლები და ამით თავის წვლილს შეიტანენ ქვეყნის შენების პროცესში“ - განაცხადა დიმიტრი ქუმსიშვილმა.

ქარხნის გახსნის ღონისძიებას პირველ ვიცე-პრემიერთან ერთად, ენერგეტიკის მინისტრი ილია ელოშვილი, „ლაფარჟჰოლციმის“ წარმომადგენელი ქსავიერ ბლონდე, სხვა ოფიციალური პირები, ბიზნესწრეების წარმომადგენლები და უცხოელი სტუმრები ესწრებოდნენ.