2017 წლის ბიუჯეტის პროექტით შემცირების ტენდენციით ხასიათდება ”სანქციების” მუხლით (ჯარიმები და საურავები) მისაღები შემოსავლების საპროგნოზო მაჩვენებელი.
კერძოდ, აღნიშნული მუხლი 5.0 მლნ ლარით (7.1%-ით) მცირდება 2016 წლის ბიუჯეტით განსაზღვრულ ანალოგიურ მაჩვენებელთან შედარებით.
”თუ გავითვალისწინებთ მიმდინარე წლის 8 თვის მდგომარეობით სანქციების (ჯარიმები და საურავები) სახით მობილიზებული სახსრების მოცულობას (წლიური გეგმის 54.9%), აღნიშნული მუხლით მისაღები შემოსავლების მიმდინარე წელთან შედარებით შემცირებულად დაგეგმვა, რეალისტურად შეიძლება შეფასდეს. მიმდინარე წლის 8 თვის მობილიზების ტენდენციის გათვალისწინებით, დადებითად უნდა შეფასდეს აგრეთვე, შერეული და სხვა არაკლასიფიცირებული შემოსავლების მუხლით მისაღები შემოსავლების საპროგნოზო მაჩვენებლის 37.6 მლნ ლარის ოდენობით შემცირება”, - აღნიშნულია სახელმწიფო აუდიტის სამსახურის მიერ მომზადებულ დასკვნაში, რომელიც მან პარლამენტს 2017 წლის ბიუჯეტის პროექტთან დაკავშირებით წარუდგინა.