თაღლითობის ფაქტზე სურსათის ეროვნული სააგენტოს ვეტერინარი დააკავეს
ფინანსთა სამინისტროს საგამოძიებო სამსახურმა სამსახურებრივი სიყალბის, ყალბი საგადასახადო დოკუმენტის დამზადება-გასაღების, ასევე თაღლითობის ფაქტზე სურსათის ეროვნული სააგენტოს თანამშრომელი - ვეტერინარი დააკავა.
როგორც საგამოძიებო სამსახური იუწყება, გამოძიებით დადგინდა, რომ ბრალდებულმა, საჯარო სამართლებრივი უფლებამოსილების განხორციელებისას, რომლის ფარგლებშიც მას ევალებოდა სააგენტოს მიერ დაკვეთილი სამუშაოს - პირუტყვის იდენტიფიკაცია/ვაქცინაცია, ასევე ხორცის ჯანმრთელობის (ვარგისობის) ნიშანდება და ბეჭდით დამოწმება, გარკვეული თანხის სანაცვლოდ და შემდგომი გრძელვადიანი თანამშრომლობისა და ფინანსური გამორჩენის მიზნით, მოქალაქეს დაუმზადა და გადასცა ყალბი ოფიციალური დოკუმენტი, თითქოსდა ხორცს ჩაუტარა ლაბორატორიული შემოწმება, ხოლო შეუმოწმებელი პირუტყვის ხორცზე, თითქოსდა პროდუქცია აკმაყოფილებდა დაწესებულ სტანდარტს, დაიტანა ვარგისიანობის ნიშანდება.
”გარდა ამისა, მატერიალური გამორჩენის მოტივით ბრალდებულმა არ განახორციელა პირუტყვის ვაქცინაცია ე.წ. ,,თურქულზე’’, რომელიც ხორციელდება სახელმწიფო პროგრამის ფარგლებში, დაამზადა ყალბი დოკუმენტი ვაქცინაციის ჩატარების თაობაზე ფორმა N1ბ, თითქოსდა პირუტყვი იყო აცრილი.
ბრალდებული დაკავებულია მოსამართლის განჩინების საფუძველზე, საქმეზე გამოძიება მიმდინარეობს საქართველოს სისხლის სამართლის კოდექსის 341-ე, 210 - ე და 180-ე მუხლით”, - ნათქვამია საგამოძიებო სამსახურის მიერ გავრცელებულ განცხადებაში.