პირველად 2001 წლის შემდეგ, ნავთობის ექსპორტიორი ქვეყნების ორგანიზაციის (OPEC) წევრი და არაწევრი ქვეყნები ნავთობის მოპოვების შემცირებაზე შეთანხმდნენ.
„ბედნიერი ვარ, განვაცხადო, რომ ჩვენ მივაღწიეთ ისტორიულ შეთანხმებას“, - განაცხადა ყატარის ენერგეტიკის მინისტრმა მოჰამედ ბინ სალე ალ-სადამ.
ოპეკ-ის განცხადებით, ორგანიზაციის არაწევრი ქვეყნები, მათ შორის რუსეთი, ნავთობის მოპოვებას დღეში 558 000 ბარელით შეამცირებენ.
„ბლუმბერგის“ ინფორმაციით, რუსეთი ნავთობის მოპოვებას დღეში 300 ათასი ბარელით შეამცირებს, მექსიკა - 100 ათასი ბარელით, ყაზახეთი - 20 000, ომანი - 40 000, აზერბაიჯანი - 35 000, ბაჰრეინი და ეკვატორული გვინეა - 12-12 000 ბარელით, სამხრეთ სუდანი - 8 000 ბარელით, ბრუნეი - 7 000, სუდანი და ბოლივია - 4-4 ათასი ბარელით დღეში.
30 ნოემბერს ოპეკ-ის წევრი ქვეყნები შეთანხმდნენ, 2017 წლის იანვრიდან ნავთობის მოპოვება ყოველდღიურად 1,2 მილიონი ბარელით შეამცირონ, რაც მათი აზრით ნავთობის ფასებს დაარეგულირებს.
ექსპერტთა განცხადებით, ოპეკ-ის ეს გადაწყვეტილება ნავთობზე ფასების ზრდას გამოიწვევს.
ოპეკ-ის მომდევნო შეხვედრა 2017 წლის 25 მაისს გაიმართება.