ირაკლი აბესაძე - მხოლოდ სუს-ის თანამშრომლები უნდა იყვნენ ბედნიერები და 7 მლნ ლარით მეტი პრემია-დანამატი აიღონ?!

საპარლამენტო უმცირესობის წევრი ირაკლი აბესაძე ინტერესდება, რა კრიტერიუმით მცირდება თავდაცვის სამინისტროს დაფინანსება და იზრდება სუს-ის. შესაბამისი კითხვებით აბესაძემ ფინანსთა მინისტრ დიმიტრი ქუმსიშვილს საპარლამენტო უმცირესობის სხდომაზე მიმართა, სადაც 2017 წლის ბიუჯეტის პროექტს განიხილავენ.

„10%-იან შემცირებას რაც შეეხება, დავიწყოთ იქიდან, რომ, სამწუხაროდ, თქვენ შეელიეთ შრომის ანაზღაურების ბიუჯეტის მხოლოდ 3,4%-ს და 50 მილიონი ლარის სახელფასო შეკვეცა მოახდინეთ. თქვენი მოადგილე დიდხანს გვიხსნიდა პარლამენტში, რატომ აღმოჩნდა თქვენი განცხადება ტყუილი და რატომ ვერ მოახერხეთ 10%-ით შრომის ანაზღაურების შემცირება, მაგრამ განსაკუთრებით სამწუხაროა, რომ ამ შემცირებული 50 მილიონიდან 26 მილიონი ლარი აკლდება თავდაცვის სამინისტროს შრომის ანაზღაურებას და უშუალოდ ჯარის დაფინანსებას აკლდება 48 მილიონი ლარი. იქნებ გვიპასუხოთ, საერთოდ ვშლით ბრიგადებს, ვუშვებთ ჯარისკაცებს სახლში და მთლიანად გვინდა გაწვევის სისტემაზე და უფასო მუშახელზე გადავიყვანოთ ჯარი თუ აპირებთ საკონტრაქტო, პროფესიული ჯარის შენარჩუნებას, მით უმეტეს, იმ გამოწვევების პირობებში, რაც საქართველოში გვაქვს? - ამ ფონზე განსაკუთრებით აღმაშფოთებელია, რომ სუს-ის სახელფასო ანაზღაურება იზრდება 7 მილიონი ლარით ისე, რომ იქ დასაქმებულთა რიცხოვნობა არ იზრდება. ანუ, მაშინ როდესაც თქვენ მიერ შექმნილი ეკონომიკური კრიზისის გამო მოსახლეობა გაღარიბდა, თქვენ მიერ შექმნილი საბიუჯეტო კრიზისის გამო ვერ იზრდება პენსიები, ვერ იზრდება პედაგოგების ხელფასები, მხოლოდ და მხოლოდ სუს-ის თანამშრომლები უნდა იყვნენ ბედნიერები ამ ქვეყანაში და 7 მილიონი ლარით მეტი პრემია-დანამატი აიღონ პოლიტიკური დავალებების შესასრულებლად, რომლის შესასრულებლადაც სუს-ი შექმნილი არ არის?! იქნებ გვიპასუხოთ, რით დაიმსახურეს მათ უფრო მეტი პრემია და დანამატი?“, - განაცხადა აბესაძემ.

ამასთან, მან ფინანსთა მინისტრს მოუწოდა, არ გაიმეოროს ის ტყუილი, რომ სუს-ი წელს ხელფასებს ვერ აფინანსებდა და შს სამინისტრო უფინანსებდა, წინააღმდეგ შემთხვევაში კი მოუწოდა, მიუთითოს ბიუჯეტის რომელი ნორმის ან რომელი პუნქტის საფუძველზე ხდებოდა ეს.

„ასეთ ტყუილს ნუ გვაკადრებთ, თუ შეიძლება“, - მიმართა აბესაძემ ქუმსიშვილს.