არჩილ თალაკვაძე - ჩვენ მხარს ვუჭერთ ბიუჯეტს, რომელმაც უნდა უზრუნველყოს მსხვილი პროექტების ინიცირება
საპარლამენტო უმრავლესობა ფინანსთა სამინისტროს მიერ წარდგენილ 2017 წლის ბიუჯეტის პროექტს მხარს უჭერს. ამის შესახებ საპარლამენტო უმრავლესობის ლიდერმა არჩილ თალაკვაძემ უმრავლესობის სხდომაზე განაცხადა, სადაც ბიუჯეტის პროექტი განიხილება. თალაკვაძემ მადლობა გადაუხადა ფინანსთა მინისტრ დიმიტრი ქუმსიშვილს, მის მოადგილეებს და სამინისტროს ყველა თანამშრომელს, ვინც ბიუჯეტის პროექტის შემუშავებაში იყო ჩართული.
”მინდა განვაცხადო უმრავლესობის სახელით, რომ ჩვენ მხარს ვუჭერთ ბიუჯეტის ისეთ კონფიგურაციას, სადაც ხდება მეტი ინვესტირება ეკონომიკურად აქტიურ ნაწილებში. იმ ნაწილებში, რომელმაც უნდა უზრუნველყოს განათლების სისტემის შემდგომი რეფორმირება და მისი უფრო ეფექტური ორიენტაცია შრომით ბაზართან მიმართებაში. მხარს ვუჭერთ ბიუჯეტს, რომელმაც უნდა უზრუნველყოს მსხვილი პროექტების ინიცირება, რაც ახალი სამუშაო ადგილების შექმნის ერთ-ერთი მთავარი წყარო უნდა იყოს და ბიუჯეტს, სადაც ხელისუფლების სოციალური პასუხისმგებლობა, სოციალური ვალდებულებები ასევე რჩება მნიშვნელოვან პრიორიტეტად”, - განაცხადა არჩილ თალაკვაძემ.