"2017 წლის სახელმწიფო ბიუჯეტი ხელს უწყობს მაკროეკონომიკურ სტაბილურობას, ინკლუზიურ და სწრაფ ეკონომიკურ აღმავლობას"
საფინანსო-საბიუჯეტო კომიტეტის თავმჯდომარე ირაკლი კოვზანაძემ პარლამენტის სასესიო სხდომაზე 2017 წლის სახელმწიფო ბიუჯეტი შეაფასა.მისი განცხადებით, ობიექტური რეალობაა, რომ მოკლე და საშუალოვადიან პერსპექტივაში საქართველო გარკვეული ეკონომიკური გამოწვევების წინაშე დგას.
”მოგეხსენებათ, მსოფლიოში ადგილი აქვს ეკონომიკური ზრდის ტემპების მკვეთრ შემცირებას, პრაქტიკულად ყველა ქვეყნის (მათ შორის ჩვენი ძირითადი სავაჭრო-ეკონომიკური პარტნიორი ქვეყნების) ვალუტების მნიშვნელოვან გაუფასურებას, დეფლაციურ პროცესებს, ძირითად სანედლეულო საქონელზე ფასების მკვეთრ ვარდნას, საერთაშორისო საფინანსო ბაზარზე მდგომარეობა მყიფე და ნაკლებად პროგნოზირებადია. ასეთ ვითარებაში სწორედ სახელმწიფო ბიუჯეტი გახდება ფინანსური სტაბილურობის უზრუნველყოფის ქვაკუთხედი უახლოესი წლების განმავლობაში, სწორედ სახელმწიფო ბიუჯეტმა ფულად საკრედიტოპოლიტიკასთან ერთად, რომელსაც ეროვნული ბანკი განახორციელებს, უნდა შეუწყოს ხელი მაკროეკონომიკურ სტაბილურობას, ინკლუზიურ და სწრაფ ეკონომიკურ აღმავლობას, დასაქმების ზრდას და საბოლოო ჯამში მოსახლეობის სოციალური მდგომარეობის გაუმჯობესებას”, - განაცხადა ირაკლი კოვზანაძემ.
მისივე თქმით, ამ მიმართულებით მთავრობას გააჩნია ჯანსაღი პოლიტიკური ამბიცია არა მხოლოდ მოკლევადიან, არამედ საშუალო და გრძელვადიან ჭრილში. ”მისასალმებელია ის მომენტი, რომ მთავრობის გეგმა ემყარება არა პოპულისტურ და ზედაპირულ ნაბიჯებს, არა მხოლოდ მიმდინარე, ამ წუთიერი ცალკეული პრობლემების მოგვარებას, არამედ მას პრიორიტეტად აქვს დასახული გრძელვადიანი და მდგრადი ეკონომიკური ზრდის საფუძვლის, ფუნდამენტის შექმნა. სწორედ ამიტომაა, რომ ჩვენი უცხოელი პარტნიორები, ელჩები, საერთაშორისო საფინასო ინსტიტუტები მხარს უჭერენ მთავრობას და წარმოდგენილი სახელმწიფო ბიუჯეტის პროექტს, რასაც კიდევ ერთხელ ადასტურებს სავალუტო ფონდის დღევანდელი განცხდება“, - განაცხადა საფინანსო-საბიუჯეტო კომიტეტის თავმჯდომარე ირაკლი კოვზანაძემ.