გიორგი კაკაურიძე სერგი კაპანაძეს - ინვესტიციები 5 %-ით არის გაზრდილი

ძალიან ბევრ თემებს შეეხეთ ბატონო სერგი, მაგრამ წარმოდგენილ პროექტს მხოლოდ ერთი უკავშირდება, ეს არის ჯანდაცვის ნაწილი, - ამის შესახებ ფინანსთა მინისტრის მოადგილემ გიორგი კაკაურიძემ „ნაციონალური მოძრაობის“ წევრს სერგი კაპანაძეს კითხვის საპასუხოდ მიმართა. უმცირესობის წარმომადგენლებსა და გიორგი კაკაურიძეს შორის შეხვედრა 2016 წლის ბიუჯეტში წარმოდგენილ ცვლილებებს შეეხება.

გიორგი კაკაურიძის განცხადებით, ინვესტიციების რაოდენობა 5%-ით არის გაზრდილი, ხოლო ტურისტების რაოდენობა მიმდინარე წელს 6 მილიონამდეა. კაკაურიძის განცხადებით, საყოველთაო ჯანდაცვას ემატება თანხები და უფრო სტაბილური და ეფექტური იქნება პროგრამის ხარჯვითი ნაწილი.

„ჩვენ შეგვიძლია ვიმსჯელოთ ყველა საკითხზე, მათ შორის ინვესტიციები 5 %-ით არის გაზრდილი, ტურისტების რაოდენობაშიც საკმაოდ დიდია ზრდა. მათ შორის 6 მილიონს გადააჭარბებს ტურისტების რაოდენობა მიმდინარე წელს, შემოსავალი ტურიზმიდან 2 მილიარდ დოლარს გასცდა და ესეც რეკორდული მაჩვენებელია. სხვა თემებზეც შეგვიძლია გავაგრძელოთ დისკუსია, მაგრამ შევეცდები მხოლოდ ბიუჯეტის ნაწილზე გაგცეთ პასუხი. საყოველთაო ჯანდაცვას ნამდვილად ემატება ფული, თუმცა არათანაბარი ხარჯვა წელს გაცილებით ნაკლებია. 2015 წელს იყო ერთ ერთი ყველაზე თანაბარი ხარჯვა, 2013 წელს ეს იყო პრობლემური, 2014 წელს შედარებით გამოსწორდა. არათანაბარ ხარჯვაზე ნამდვილად ვერ დაგეთანხმებით. გავლენა სახაზინო ოპერაციების ფულის მასასთან დაკავშირებით, ანუ ეკონომიკაში ჩავდეთ მეტი ფული თუ ამოვიღეთ. წლის დასაწყისიდან 250 მილიონ ლაზე მეტია ამოღებული ბიუჯეტის ოპერაციებით ფულის მასიდან ამიტომ, ეს კარგია თუ ცუდი ეს მეორე თემაა. თუ გვინდა, რომ ფულის მასა გავზარდოთ ეკონომიკაში მაშინ დეფიციტი იზრდება, თუ გვინდა რომ შევამციროთ, შეიძლება დეფიციტის შემცირების ხარჯზე უფრო მეტი ფული ამოვიღოთ. დეფიციტი ნიშნავს, რომ ეკონომიკაში მეტ ფულს ტოვებ და საბოლოო ჯამში ეკონომიკის ზრდას უწყობს ეს ყველაფერი ხელს. მომდევნო წლის საყოველთაო ჯანდაცვის კუთხით დაწყებულია მუშაობა, ხარჯვითი ნაწილი უფრო სტაბილური და ეფექტური იქნება“, - აღნიშნა გიორგი კაკაურიძემ.

სერგი კაპანაძემ მინისტრის მოადგილის პასუხის შემდეგ რეპლიკა გააკეთა: - „თქვენ გინდათ აჩვენოთ, რომ ყველაფერი კარგადაა, მაგრამ არ არის კარგად“, - აღნიშნა სერგი კაპანაძემ.