აგრარულ სექტორში ურთიერთთანამშრომლობის პერსპექტივების დასახვაზე შეხვედრა გაიმართა

აგრარულ საკითხთა კომიტეტის თავმჯდომარე, ოთარ დანელია საქართველოში ჩინეთის სახალხო რესპუბლიკის საგანგებო და სრულუფლებიან ელჩს, იენჩი ძის შეხვდა.პარლამენტის პრესსამსახურის ინფორმაციით, გაცნობითი ხასიათის შეხვედრაზე, მხარეებმა, საპარლამენტთაშორისო თანამშრომლობის განვითარებასა და საპარლამენტო მეგობრობის ჯგუფებს შორის ურთიერთობის გაღრმავებაზე ისაუბრეს. მიმოიხილეს ორ ქვეყანას შორის არსებულ სავაჭრო-ეკონომიკური ურთიერთობები და აგრარულ სექტორში ურთიერთთანამშრომლობის პერსპექტივები დასახეს.

„ბოლო რამდენიმე წლის განმავლობაში განსაკუთრებული ურთიერთობები ჩამოყალიბდა საქართველოში ჩინეთის სახალხო რესპუბლიკასა და საქართველოს შორის. თუმცა მნიშვნელოვანია ამ ურთიერთობების კიდევ უფრო განვითარება. ჩვენ ვისაუბრეთ ორ ქვეყანას შორის აგრარულ სექტორში ურთიერთთანამშრომლობის კიდევ უფრო გაღრმავებაზე. შეხვედრაზე ორივე მხარის მიერ ხაზგასმით აღინიშნა, რომ მნიშვნელოვანია მეგობრობის ჯგუფების გამოყენება ჩინეთსა და საქართველოს შორის ურთიერთობებში ისეთი ახალი მიმართულებების გასაჩენად, როგორიცაა სოფლის მეურნეობა და ინფრასტრუქტურული პროექტები. როგორც აბაშა-მარტვილის მაჟორიტარი დეპუტატმა, ყურადღება გავამახვილე მუნიციპალური პროექტების განხორციელებაზე და ჩვენი ქალაქების დამეგობრებაზე, რათა კიდევ უფრო ინტენსიური იყოს ურთიერთობები ქვეყნებს შორის და ორ მხარეს შორის მოხდეს როგორც კულტურული, ისე ეკონომიკური თანამშრომლობა“, - განაცხადა ოთარ დანელიამ.

მისივე თქმით, სულ რაღაც რამდენიმე წლის წინ რამდენიმე ასეული ბოთლი ღვინის ექსპორტი ხორციელდებოდა. მიმდინარე წლის ბოლოს კი ეს თითქმის 5 მლნ. ბოთლამდე გაიზარდა.