2016 წლის 30 სექტემბრის მდგომარეობით, საქართველოს მთლიანმა საგარეო ვალმა 15.3 მლრდ აშშ დოლარი შეადგინა
2016 წლის 30 სექტემბრის მდგომარეობით, საქართველოს მთლიანმა საგარეო ვალმა 15.3 მლრდ აშშ დოლარი (35.7 მლრდ ლარი) შეადგინა, - ამის შესახებ ეროვნული ბანკის მიერ გამოქვეყნებულ ინფორმაციაშია ნათქვამი.როგორც ეროვნული ბანკიდან იუწყებიან, მთლიანი საგარეო ვალის სტატისტიკა ჰარმონიზებულია საგადასახდელო ბალანსთან. იგი მოიცავს სახელმწიფო (სამთავრობო სექტორი, სახელმწიფო საწარმოები და ეროვნული ბანკი) და კერძო სექტორის (საბანკო და სხვა სექტორები) საგარეო ვალს. საგარეო ვალის სტატისტიკა წარმოებულია საერთაშორისო სავალუტო ფონდის მიერ შემუშავებული მეთოდოლოგიის, „საგარეო ვალის სტატისტიკა, სახელმძღვანელო შემდგენელთათვის და მომხმარებლებისათვის" - 2003, შესაბამისად.
ეროვნული ბანკის ინფორმაციით, საქართველოს მთლიანმა საგარეო ვალმა 2016 წლის 30 სექტემბრის მდგომარეობით, 15.3 მლრდ აშშ დოლარი (35.7 მლრდ ლარი) შეადგინა, რაც ბოლო ოთხი კვარტალის მშპ-ს 108.8 პროცენტია; 2016 წლის მესამე კვარტალში საქართველოს მთლიანი საგარეო ვალი 173.2 მლნ აშშ დოლარით გაიზარდა, აქედან ვალი ოპერაციული ცვლილებების გამო 108.6 მლნ აშშ დოლარით გაიზარდა.
სებ-ის ცნობით, სახელმწიფო საგარეო ვალმა შეადგინა 6.5 მლრდ აშშ დოლარი (15.0 მლრდ ლარი), რაც მშპ-ს 45.8 პროცენტია, რომლიდანაც სამთავრობო სექტორის ვალია 4.6 მლრდ აშშ დოლარი (10.8 მლრდ ლარი; მშპ-ს 33.0 პროცენტი), ეროვნული ბანკის ვალდებულებები - 210.8 მლნ აშშ დოლარი (491.1 მლნ ლარი; მშპ-ს 1.5 პროცენტი), ხოლო სახელმწიფო საწარმოების ობლიგაციები და სესხები შესაბამისად - 901.0 მლნ აშშ დოლარი (2.1 მლრდ ლარი; მშპ-ს 6.4 პროცენტი) და 697.2 მლნ აშშ დოლარი (1.6 მლრდ ლარი; მშპ-ს 4.9 პროცენტი).
საბანკო სექტორის საგარეო ვალმა შეადგინა 3.0 მლრდ აშშ დოლარი (7.1 მლრდ ლარი; მშპ-ს 21.5 პროცენტი), სხვა სექტორების საგარეო ვალმა - 5.0 მლრდ აშშ დოლარი (11.7 მლრდ ლარი; მშპ-ს 35.7 პროცენტი) და კომპანიათაშორისო ვალმა - 2.4 მლრდ აშშ დოლარი (5.6 მლრდ ლარი; მშპ-ს 17.1 პროცენტი). მთლიანი საგარეო ვალის 93.4 პროცენტი დენომინირებულია უცხოური ვალუტით.
საქართველოს წმინდა საგარეო ვალმა, 2016 წლის 30 სექტემბრის მდგომარეობით, 9.3 მლრდ აშშ დოლარი (21.6 მლრდ ლარი) შეადგინა, რაც ბოლო ოთხი კვარტალის მშპ-ს 65.7 პროცენტია. აქედან, სახელმწიფო სექტორის წმინდა საგარეო ვალი 3.6 მლრდ აშშ დოლარია (8.3 მლრდ ლარი), რაც მშპ-ს 25.3 პროცენტია.
„2016 წლის მესამე კვარტალში საქართველოს ეროვნული ბანკის საგარეო ვალი 2.7 მლნ. აშშ დოლარით შემცირდა. აქედან, ოპერაციული ცვლილებების გამო ეროვნული ბანკის საგარეო ვალდებულებები 2.2 მლნ აშშ დოლარით შემცირდა და საკურსო ცვლილებების გამო კლებამ 467.3 ათასი აშშ დოლარი შეადგინა. 2016 წლის მესამე კვარტალის ბოლოს ეროვნული ბანკის მთლიანმა ვალდებულებებმა 210.8 მლნ აშშ დოლარი შეადგინა. აქედან, 201.0 მლნ აშშ დოლარი განაწილებული ნასესხობის სპეციალური უფლებაა (ნსუ), რომელსაც არ აქვს დაფარვის ვადა და პრაქტიკულად, მისი გადახდის ვალდებულება არ დადგება, სანამ საქართველო იქნება საერთაშორისო სავალუტო ფონდის წევრი“, - ნათქვამია ინფორმაციაში.