კონკურენციის სააგენტო Booking.com-ის საკითხთან დაკავშირებით განმარტებას აკეთებს

საქართველოს კონკურენციის სააგენტო Booking.com-ის საკითხთან დაკავშირებით განმარტებას აკეთებს. როგორც კონკურენციის სააგენტო იუწყება, საქართველოს კონკურენციის სააგენტოში სასტუმროების დაჯავშნის ონლაინ-პორტალ Booking.com-ის წინააღმდეგ შესული განცხადების შესწავლას არასწორი გამოხმაურება მოჰყვა, რასთან დაკავშირებითაც კონკურენციის სააგენტო განმარტავს, რომ აღნიშნულ საკითხზე მოკვლევა ამ ეტაპზე დაწყებული არ არის.

„კონკურენციის სააგენტო მხოლოდ იმ განცხადების დასაშვებობას განიხილავს, რომელიც 15 ნოემბერს, არასამთავრობო ორგანიზაციამ "კონკურენციის სამართლისა და მომხმარებელთა დაცვის ცენტრი" შემოიტანა. ავტორი მიიჩნევს, რომ Booking.com-ის მიერ სასტუმროებთან დადებული ხელშეკრულების ერთ-ერთი მუხლი, კონკურენციის სამართლის კუთხით, პრობლემურია. გვსურს განვმარტოთ, რომ კონკურენციის სააგენტო ვალდებულია, რეაგირება მოახდინოს ნებისმიერ შემოსულ განცხადებაზე და საკითხი ამომწურავად შეისწავლოს. საკითხის სიღრმისეული კვლევის მიზნით, იგეგმება Booking.com-ის წარმომადგენლებთან გასაუბრება. უკვე გამოთხოვილია ინფორმაცია სასტუმროების ბაზარზე მოქმედი კომპანიებიდან, კერძოდ, მათსა და Booking.com-ს შორის დადებული ხელშეკრულებების ასლები; "კონკურენციის სამართლისა და მომხმარებელთა დაცვის ცენტრის" ხელთ არსებული ინფორმაცია და ა.შ.“, - ნათქვამია განცხადებაში.

დაიწყება თუ არა მოკვლევა Booking.com-თან დაკავშირებით, კონკურენციის სააგენტო 10 იანვრამდე გადაწყვეტს.