ლტოლვილთა სამინისტრო 44 ეკომიგრანტ ოჯახს სახლს შეუსყიდის
საქართველოს ოკუპირებული ტერიტორიებიდან იძულებით გადაადგილებულ პირთა , განსახლებისა და ლტოლვილთა სამინისტროში „სტიქიური მოვლენების შედეგად დაზარალებული და გადაადგილებას დაქვემდებარებული ოჯახების განსახლების საკითხების მარეგულირებელი კომისიის“ სხდომა გაიმართა.
როგორც საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროდან იუწყებიან, კომისიამ 2017 წლის საბიუჯეტო ასიგნების ფარგლებში, ეკომიგრანტი ოჯახების უსაფრთხო გარემოში განსახლების საკითხზე იმსჯელა. ამ ეტაპზე, კომისიის გადაწყვეტილებით, სამინისტრო სახლს სტიქიით დაზარალებულ 44 ოჯახს შეუსყიდის.
”აღნიშნულ ოჯახებს საშუალება მიეცემათ უსაფრთხო ადგილზე მდებარე საცხოვრებელი სახლი, 25 000 ლარის ფარგლებში, თავისი სურვილის მიხედვით შეარჩიონ”, - აცხადებენ სამინისტროში.
მათივე ინფორმაციით, კომისიის სხდომას მინისტრის პირველი მოადგილე გრიგოლ გიორგაძე, ეკომიგრანტთა საკითხების დეპარტამენტის თანამშრომლები, საერთაშორისო და ადგილობრივი არასამთავრობო ორგანიზაციების წარმომადგენლები ესწრებოდნენ.