საქართველოს სავაჭრო-სამრეწველო პალატის თანაორგანიზებით, ფრენჩაიზინგის საერთაშორისო გამოფენა გაიმართება

საქართველოს სავაჭრო-სამრეწველო პალატის თანაორგანიზებით, ივნისში საქართველოში პირველად, ფრენჩაიზინგის საერთაშორისო გამოფენა - BUYBRAND Transcaucasia გაიმართება.

საქართველოს სავაჭრო-სამრეწველო პალატის ინფორმაციით, მცირე და საშუალო ბიზნესისთვის ერთ-ერთი ყველაზე მასშტაბური ღონისძიება საგამოფენო ცენტრ „ექსპო ჯორჯიაში“ მოეწყობა. გამოფენაში 100-ზე მეტი ცნობილი ბრენდი მიიღებს მონაწილეობას, რომლებიც ინვესტორებს საკუთარ ფრენჩაიზებს წარუდგენენ.

გამოფენის ორგანიზატორის ეკატერინა სოიაკის განცხადებით, „საქართველოში უახლოეს წლებში ტურისტული ნაკადის მკვეთრი ზრდაა მოსალოდნელი და შესაბამისად, იზრდება მოთხოვნა ფრენჩაიზებზე კაფეების, რესტორნების, სწრაფი კვების ობიექტებისა და სასტუმროების მიმართულებით.

„ამ სექტორში ინვესტიციებმა შესაძლოა, გაზარდოს შემოსავლები საქართველოს ბიუჯეტში წლიურად 20%-ით. ახლა საქართველოში კვების ბიზნესის წლიური ბრუნვა 1 მილიარდ დოლარს აჭარბებს, რაც რეგიონის სხვა ქვეყნების იგივე მაჩვენებელს თითქმის 2-ჯერ აჭარბებს. შედარებისთვის: სომხეთში ამ სექტორის წლიური ბრუნვა 500-600 მილიონი დოლარია. უნდა აღინიშნოს, რომ კაფეები და რესტორნები ძირითადად დედაქალაქში იხსნება. ამის მიზეზი ის არის, რომ სხვადასხვა მიზეზების გამო ხალხი ერიდება ინვესტიციის სარესტორნო ბიზნესში ჩადებას. ამ სიტუაციის გამოსწორება ფრენჩაიზის საშუალებით არის შესაძლებელი. ეს ნიშნავს მინიმალურ რისკს, მზა ბიზნესს და სტაბილურ შემოსავალს“, - აცხადებს ეკატერინა სოიაკი.

ორგანიზატორთა მოსაზრებით, საქართველო ბიზნეს-აქტივობის კუთხით რეგიონში კოორდინაციის კერად მოიაზრება. ამ ქვეყანაში ბიზნესის დაწყებით პოტენციურ ინვესტორებს საშუალება აქვთ სომხეთსა და აზერბაიჯანში გასვლის პერსპექტივებიც განიხილონ.

„ახლა საქართველოში 100-ზე მეტი საერთაშორისო ბრენდია წარმოდგენილი, რომელთა შორისაც არის ათობით უმსხვილესი ფრენჩაიზი. განსაკუთრებით აქტიური სფეროებია: სწრაფი კვება, კვებითი მომსახურება, ქეითერინგი, ტანსაცმელი, სასტუმროები, სილამაზისა და ჯანმრთელობის სექტორი“,- განაცხადა ეკონომიკისა და მდგრადი განვითარების მინისტრის მოადგილემ ქეთევან ბოჭორიშვილმა.

მისი თქმით, 2016 წელს საქართველო 6,4 მილიონმა ტურისტმა დაათავალიერა და მათ მიერ სხვადასხვა მომსახურებისთვის დახარჯულმა თანხამ 2 მილიარდ დოლარს გადააჭარბა.

„ამ თანხის უმეტესი ნაწილი თბილისზე მოდის, სადაც მოსახლეობის მხოლოდ 30% ცხოვრობს. ამას გარდა, ის ფრენჩაიზები, რომლებიც უკვე არიან საქართველოს ბაზარზე ძირითადად თბილისში არიან წარმოდგენილნი. ამიტომ, ახლა აუცილებელია, ტურიზმი რეგიონებშიც გავაფართოვოთ, სადაც ადგილობრივ მეწარმეებს ბიზნესის ნებისმიერი სახე აინტერესებთ. პერსპექტივები საქართველოში ყველასთვის არის როგორც მოქმედი, ასევე ახალი კომპანიებისთვის“, - აღნიშნა ქეთევან ბოჭორიშვილმა.

ორდღიან გამოფენასთან ერთად საქართველოში გაიმართება ბიზნეს-ფორუმიც, სადაც სიტყვით მსოფლიო ფრენჩაიზინგის წამყვანი კომპანიების პირველი პირები გამოვლენ, ასევე ფრენჩაიზინგის სფეროს ექსპერტები და კონსულტანტები. მათთვის, ვინც გამოფენაზე თბილისში ჩამოსვლას ვერ შეძლებს, იმუშავებს სპეციალური აპლიკაცია ტელეფონებისთვის „EXPOWL“, რომელიც იძლევა საშუალებას, ნებისმიერი ქვეყნიდან მსურველები ჩაერთონ ღონისძიებაში და სტენდები დაათვალიერონ.

დღეისთვის, ყველაზე მაღალი დაინტერესება დაგეგმილი გამოფენის მიმართ ბრიტანულმა სწრაფი კვების ქსელმა „ Southern Fried Chicken“, ამერიკული სასტუმროების ქსელმა „Best Western“, გერმანული ფეხსაცმლის მწარმოებელმა ქსელმა „Tamaris“, ამერიკული ბურგერების ქსელმა „ Carl’s Jr.“, კაფეების ქსელმა „Baskin Robins“ და სხვა ცნობილმა ბრენდებმა გამოთქვეს.