მართვის მოწმობის 100-ქულიანი სისტემა წლის ბოლომდე ამოქმედდება
მართვის მოწმობის 100-ქულიანი სისტემა სავარაუდოდ წლის ბოლომდე ამოქმედდება. პარლამენტი ”საგზაო მოძრაობის შესახებ“ კანონში დაგეგმილი ცვლილებების და მასთან დაკავშირებული კანონპროექტების განხილვას უბრუნდება. როგორც საპარლამენტო უმრავლესობის ლიდერმა არჩილ თალაკვაძემ განაცხადა, მომზადებული საკანონმდებლო ცვლილებათა პაკეტის მიღება, რომელიც მათ შორის მართვის მოწმობის 100-ქულიანი სისტემის შემოღებას გულისხმობს, დიდი ალბათობით, საგაზაფხულო სესიის ფარგლებშივე მოხდება. ცვლილებების ამოქმედების კონკრეტული თარიღი არ სახელდება, თუმცა ახალი რეგულაციები, სავარაუდოდ, შემოდგომიდან ამოქმედდება.
„სხვა ცვლილებებთან ერთად იგეგმება ქულების სისტემის შემოტანა, რომლის საშუალებითაც წლის განმავლობაში ის, ვინც საპატრულო პოლიციის მიერ პირადად დაჯარიმდება, დაკარგავს ქულებსაც და 100-ქულიანი ლიმიტის ამოწურვის შემდეგ მოუწევს მართვის მოწმობის შეჩერება. ამ სისტემით ის მძღოლებიც, რომელთაც ჯარიმების გადახდა ადვილად შეუძლიათ, იგრძნობენ მეტ პასუხისმგებლობას“, - განაცხადა არჩილ თალაკვაძემ.
მისივე განმარტებით, სავარაუდოდ, გამკაცრდება ადმინისტრირება ისეთ დარღვევებზეც, რომელიც ავარიების ხშირი მიზეზია (სიჩქარის გადაჭარბება, მანევრირების წესების დარღვევა, ალკოჰოლის ზემოქმედების ქვეშ მართვა და სხვა).
„მკაცრდება კანონმდებლობა ქვეითების დასაცავად და ავტოტრანსპორტით ბავშვების გადაყვანის უსაფრთხოების მიმართულებითაც“, - აღნიშნა საპარლამენტო უმრავლესობის ლიდერმა.
როგორც ცნობილია, აღნიშნულის გარდა, რეფორმა ითვალისწინებს ასევე უკონტაქტო პატრულირების დანერგვას, რაც ევროპასა და ამერიკაში აპრობირებული მოდელია და სამოქალაქო მანქანებით, რომელთაც სპეციალური ნიშანი ექნება, პატრულირებას და ვიდეოდაჯარიმებას გულისხმობს. ასევე შემოდის მართვის მოწმობის გამოცდის რეალურ მოძრაობაში ჩაბარების სისტემა.