„ყატარის ავიახაზები“ თბილისსა და დოჰას შორის დღეში ორი სიხშირით იფრენს

„ყატარის ავიახაზები“ ზრდის ფრენის სიხშირეს დოჰა-თბილისი-დოჰას მიმართულებით და მიმდინარე წლის პირველი მაისიდან რეგულარულ რეისებს დღეში ორჯერ შეასრულებს.

როგორც ეკონომიკისა და მდგრადი განვითარების სამინისტრო იუწყება, განახლებული ფრენის განრიგს ავიაკომპანია საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოში უახლოეს დღეებში წარადგენს. ავიარეისები Airbus 320 ტიპის საჰაერო ხომალდებით შესრულდება.

მათივე ინფორმაციით, თბილისის მიმართულებით ფრენების ინტენსივობის გაზრდის შესახებ „ყატარის ავიახაზების“ მესვეურებმა ავიაკომპანიის საქართველოს ავიაბაზარზე შემოსვლის ხუთი წლის იუბილესთან დაკავშირებით გამართულ მიღებაზეც ისაუბრეს. ღონისძიებაზე მოწვეულ სტუმრებს შორის სამოქალაქო ავიაციის სააგენტოს, „ტავ ჯორჯიას,“ „საქართველოს აეროპორტების გაერთიანებისა“ და მსხვილი ტურ-ოპერატორების პირველი პირები იყვნენ.

როგორც ავიაკომპანიის აღმოსავლეთ ევროპის რეგიონის უფროსმა, კომერციულმა მენეჯერმა ჯოვანი სიმონინმა შეხვედრაზე აღნიშნა, „ყატარის ავიახაზები“ დადებითად აფასებს საქართველოს ავიაბაზარზე ოპერირების 5 წლიან პერიოდს, ასევე ავიაკომპანიის ადგილობრივი წარმომადგენლობის წარმატებულ საქმიანობას მგზავრთა მოზიდვის თვალსაზრისით. ავიაკომპანიის ინფორმაციით, როგორც საქართველოს, ისე ყატარისა და მთლიანად შუა აღმოსავლეთის რეგიონის მგზავრების მხრიდან მოთხოვნა დოჰა-თბილისი-დოჰას მიმართულებაზე წლიდან წლამდე განუხრელად იზრდება.

„ყატარის ავიახაზები“ საქართველოს საავიაციო ბაზარზე 2012 წლის თებერვალში შემოვიდა. ხუთვარსკვლავიანმა ავიაკომპანიამ ოპერირება დოჰა-ბაქო-თბილისი თბილისი-ბაქო-დოჰას საჰაერო ხაზზე კვირაში 7 სიხშირით დაიწყო, 2016 წლის დეკემბრიდან კი 4 ახალი სიხშირე დაამატა შუალედური (ბაქო) პუნქტის გარეშე.