ევრო დრაგის გადაწყვეტილებას ელის
დღეს და ხვალ საფინანსო ბაზარი ორი მეტად მნიშვნელოვანი ინფორმაციის მოლოდინშია.
დღეს ევროპის ცენტრალურმა ბანკმა (ECB) უნდა გადაწყვიტოს ევროზე საპროცენტო განაკვეთის საკითხი. ხვალ კი ამერიკის შეერთებული შტატების შრომის ბაზრის სტატისტიკა გამოქვეყნდება. ორივეს სავალუტო ბაზარზე ძლიერი რყევის გამოწვევა შეუძლია.
ბოლოს დროს, ევროზონის ეკონომიკა გაჯანსაღების ნიშნებს ავლენს. რაც მთავარია, ინფლაციის დონე მიუახლოვდა ECB-ს 2%-იან "ოქროს მიჯნას“. ეს კი თეორიულად იმის საწინდარი უნდა იყოს, რომ ECB რაოდენობრივი შემსუბუქების პროგრამის შეკვეცას დაიწყებს. ლოგიკურად, ეს პირველი ნაბიჯი უნდა იყოს, ვიდრე ევროს განაკვეთის ზრდა დაიწყება.
თუმცა არსებობს გარემოება, რომლის გამოც ECB-მ და მისმა პრეზიდენტმა მარიო დრაგიმ შეიძლება მოცდა ამჯობინონ. მით უმეტეს, გერმანიაში გამოქვეყნებული ბოლო სტატისტიკური მონაცემები (IFO, სავაჭრო ბალანსი და სამრეწველო წარმოება) არ იძლევა სტაბილურობის გარანტიას. მეორე მხრივ, ECB-ს ამ ეტაპზე შედარებით სუსტი ევრო ხელს აძლევს იმისთვის, რომ ინფლაციის დონე არ დაეცეს.
გარდა იმისა, რომ ბაზარი ECB-ს გადაწყვეტილებას ელის, ასევე ძალიან მნიშვნელოვანია დრაგის პრესკონფერენცია, რომელზეც ევროპის ცენტრალური ბანკის გადაწყვეტილების და შემდგომი ნაბიჯების შესახებ იქნება საუბარი. ნებისმიერი მინიშნება განაკვეთის უახლოეს მომავალში აწევის, ან რაოდენობრივი შემსუბუქების პროგრამის შეკვეცის დაწყების შესახებ, ევროს კურსის სწრაფ გამყარებას გამოიწვევს. თუმცა ეს პროცესი საფრანგეთის პრეზიდენტის არჩევნებამდე არ იქნება მყარი. ან მანამ მაინც, სანამ პრეზიდენტობაზე მარინ ლე პენის შანსი მეტნაკლებად რეალური იქნება.
რაც შეეხება ამერიკის შრომის ბაზარს, გუშინ გამოქვეყნდა არასასოფლო სფეროს კერძო სექტორში დასაქმებულთა რიცხვის ცვლილება. სტატისტიკამ აჩვენა, რომ თებერვალში ამ სფეროში მომუშავეთა რაოდენობა (ADP) 298 ათასით გაიზარდა, რაც მოსალოდნელზე (187 ათასი) გაცილებით მეტია. რაც მთავარია, ეს არის რეალური წინაპირობა იმისა, რომ დღეს გამოქვეყნებული მონაცემებიც (NFP - არასასოფლო სექტორში დასაქმების ცვლილების საერთო მაჩვენებელი, უმუშევრობის დონე და საათობრივი ანაზღაურების ზრდის მაჩვენებელი) დადებითი იქნება.
ამ შემთხვევაში, ფედერალურ სარეზერვო სისტემას ხელს არაფერი შეუშლის იმაში, რომ დოლარზე განაკვეთი კვლავ ასწიოს (FOMC-ის სხდომა 14-15 მარტსაა), რასაც თეორიულად, ამერიკული ვალუტის გამყარების გამოწვევა შეუძლია. თუმცა აქ ის ფაქტორიც არის გათვალისწინებული, რომ ბაზარს ამის შესაძლებლობა სავალუტო კურსებში უკვე ასახული აქვს. ამიტომ, კურსების რყევა შესაძლოა ძლიერი არც იყოს.
უფრო სწორი იქნება იმის ვარაუდი, რომ დოლარს ყველა ძირითად ვალუტასთან წყვილში განსხვავებული რეაქცია ექნება. ალბათ ლაპარაკიც ზედმეტია იმაზე, რომ შრომის ბაზრის არადამაკმაყოფილებელი სტატისტიკა, დოლარის კურსის ძლიერ ვარდნას გამოიწვევს. მაგრამ თებერვლის ADP-ს და იანვრის ADP-ს და NFP-ის ძლიერი მაჩვენებლების გათვალისწინებით შეიძლება ითქვას, რომ ასეთი სცენარი ნაკლებად მოსალოდნელია.
მერაბ ლორთქიფანიძე