დიმიტრი ქუმსიშვილი - სოციალურად პასუხისმგებლიანი მთავრობისთვის ოპოზიციის ინიციატივის განხორციელება აბსოლუტურად წარმოუდგენელია

სოციალურად პასუხისმგებლიანი მთავრობისთვის, მთავრობისთვის, რომელიც ზრუნავს იმაზე, რომ ქვეყანაში მოხდეს ეკონომიკური ზრდა, ოპოზიციის მხრიდან წამოყენებული ინიციატივის განხორციელება აბსოლუტურად წარმოუდგენელია , - ამის შესახებ პირველმა ვიცე-პრემიერმა, ფინანსთა მინისტრმა, დიმიტრი ქუმსიშვილმა განაცხადა.

მისი თქმით, მცირე და საშუალო ბიზნესის მხარდაჭერის შესახებ „ევროპული საქართველოს“ მიერ წარმოდგენილი პროგრამის ამოქმედების შემთხვევაში, სახელმწიფოს ბევრი მიმართულებით პრობლემა შეექმნება.

„ჩვენი ფისკალური გეგმით, რომელიც უკვე შეთანხმებულია საერთაშორისო სავალუტო ფონდთან და რომელიც წარვადგინეთ გასული წლის ბოლოს, 2020 წლისთვის, მიმდინარე ხარჯები მთლიან შიდა პროდუქტთან მიმართებაში 26,5%-იდან 21,5%-მდე უნდა შემცირდეს. 2018 წლისთვის მთლიან შიდა პროდუქტთან მიმართებაში იგი შეადგენს 23,5%-ს. ამავდროულად, უნდა გაიზარდოს ინვესტიციები კაპიტალური დანახარჯების მიმართულებით. ოპონენტების მიერ წარმოდგენილი პროექტი, რაც ზედაპირულად ვნახე ნიშნავს იმას, რომ დაახლოებით, მილიარდნახევარი ლარი დააკლდება ბიუჯეტს 2018 წელს, რომლის კომპენსაციის რამდენიმე გზა არსებობს. მაგალითად, ეს ნიშნავს იმას, რომ საჯარო სექტორში აბსოლუტურად ყველა მიმართულებით 80%-ით უნდა შემცირდეს ხელფასები, როგორც ჯარში, ისე პოლიციაში, ან მთლიანად გავანულოთ - არ უნდა გავცეთ პენსიები, ან მაგალითად, უნდა შევწყვიტოთ უნივერსალური ჯანდაცვა და ყველა სოციალური დახმარება, რაც რა თქმა უნდა, შეუძლებელია,“ - განაცხადა დიმიტრი ქუმსიშვილმა.

მისი თქმით, ბიუჯეტში ამ მოცულობის დანაკლისის კომპენსირების მეორე მიმართულებაა თუ სახელმწიფო შეწყვეტს საინვესტიციო პროექტებს.

„ეს კი ნიშნავს იმას, რომ ყველაფერი, რაც დღეს გვაქვს დაგეგმილი, უნდა შემცირდეს 40%-ით. მაგალითად, არ უნდა აშენდეს თბილისი-ბათუმის ავტომაგისტრალი, ან მისმა მშენებლობამ უნდა გადაიწიოს 5 ან 8 წლით, არ უნდა აშენდეს ის ტურისტული გზები, რომელიც დაგეგმილი გვაქვს და რომელიც ძალიან დიდი სარგებლის მომტანია ჩვენი ქვეყნისთვის, ან მაგალითად არ უნდა აშენდეს ქუთაისი-აბასთუმნის, ქუთაისი-მესტიის, ჯუთა-არხოტის მიმართულებიდან ყაზბეგის მიმართულებით გზები, არ უნდა მოხდეს ქუთაისის აეროპორტის გაფართოება, არ უნდა განვახორციელოთ წყალმომარაგების პროექტები, რომელსაც ვაფინანსებთ და ა.შ აქედან გამომდინარე, რა თქმა უნდა, ოპოზიციის მხრიდან ძალიან მარტივია ასეთი განცხადებების გაკეთება, მაგრამ სოციალურად პასუხისმგებლიანი მთავრობისთვის, მთავრობისთვის, რომელიც ზრუნავს იმაზე, რომ ქვეყანაში მოხდეს ეკონომიკური ზრდა, ეს აბსოლუტურად წარმოუდგენელია,“ - განაცხადა დიმიტრი ქუმსიშვილმა.

როგორც ფინანსთა მინისტრმა აღნიშნა, კაპიტალური დანახარჯის ნაწილში ეს შემცირება გამოიწვევს ეკონომიკის შემცირებას, ეს თავისთავად ნიშნავს იმას, რომ ქვეყანაში ვერ შეიქმნება ახალი სამუშაო ადგილები.

„ევროპული საქართველოს” მცირე და საშუალო ბიზნესის მხარდაჭერის პროგრამა 7 პუნქტს მოიცავს, ესენია - ბენზინზე, დიზელსა და გაზზე აქციზი განახევრდეს; დღიურად 550 ლარამდე საშუალო ბრუნვის მქონე ბიზნესი არ დაიბეგროს, ასეთმა ბიზნესმა არ გადაიხადოს დღგ; უძრავი ქონების გასხვისების გადასახადი გაუქმდეს; საშემოსავლო გადასახადმა დაიწიოს 2018 წლიდან - 15%-მდე, 2019 წლიდან - 12.5%-მდე, 2020 წლიდან - 10%-მდე; განაწილებული მოგების გადასახადი შემცირდეს 10%-მდე; იმპორტის გადასახადი გაუქმდეს; საპროცენტო სარგებელზე გადასახადი გაუქმდეს. ”ევროპულმა საქართველომ” აღნიშნული პროგრამა პარლამენტში წარადგინა.