ალეკო ელისაშვილი - თსუ-ის მაღლივი კორპუსის მიმდებარედ, ოთხი 30-სართულიანი კორპუსის ასაშენებლად ტერიტორიას შესაძლოა რეკრეაციული ზონის სტატუსი გაუუქმდეს
ქავთარაძის ქუჩაზე, თსუ-ის მაღლივი კორპუსის მიმდებარედ, ოთხი 30-სართულიანი კორპუსის ასაშენებლად ტერიტორიას შესაძლოა რეკრეაციული ზონის სტატუსი გაუუქმდეს. ამ მოთხოვნის განსახილველად თბილისის საკრებულოში მერიიდან საკითხი შევიდა.
როგორც ჟურნალისტებს თბილისის საკრებულოს დამოუკიდებელმა დეპუტატმა ალეკო ელისაშვილმა განუცხადა, აღნიშნული საკითხი საკრებულოში განსახირლველად მერიის ზონალური საბჭოდან შევიდა. პროექტის დამტკიცების შემთხვევაში კორპუსების აშენებას კომპანია „მ2“ აპირებს.
ელისაშვილის თქმით, აღნიშნულ ტერიტორიას რეკრეაციული ზონა 1-ის სტატუსი აქვს მინიჭებული. მერიის ზონალური საბჭო ადგილისთვის რეკრეაციუალი ზონის სტატუსის გააუქმებას ითხოვს, რაც იქ ხეების გაჩეხვას გამოიწვევს.
„ეს ადგილი არის რეკრეაციული ზონა 1. იქ გერმანელი ტყვეების სასაფლაოებია და მშენებლობის შემთხვევაში გერმანელი ტყვეების ძვლების გადაყრა უნდა მოხდეს. ვფიქრობ, გერმანიის საელჩოს პოზიცია ექნება ამასთან დაკავშირებით. უნივერსიტეტის მაღლივსა და კორპუსებს შორის ფიჭვნარია და ერთადერთი მწვანე სივრცე ქავთარაძის ქუჩის ამ მონაკვეთის მოსახლეობისთვის. არაფრით არ შეიძლება ამ პროექტის გატანა, ზონის ცვლილება და იქ ოთხი მაღლივი კორპუსის მშენებლობა.
თუ დააკვირდებით, ბოლო ერთი თვის განმავლობაში, მერიაც და საკრებულოც მოსწრებაზეა, ყველა ოდიოზური და საძაგელი პროექტი გამოიტანონ, სანამ თვითმმართველობის არჩევნები გამოცხადდება. თვითმმართველობის არჩევნების გამოცხადების შემდეგ ყველას ქალაქი და მწვანე სივრცეები შეუყვარდება და მოუწევთ ხალხს ანგარიში გაუწიონ“, - განაცხადა ელისაშვილმა.
ელისაშვილი დარწმუნებულია, რომ ამ პროექტების უკნა კორუფციული გარიგებაა.
მისივე თქმით, საკითხი ჯერ ურბანულ კომისიაზე გავა განსახილველად. შემდეგ კი საკრებულოს სხდომაზე. საკრებულოში ამ საკითხის განხილვა კომისიის სხდომაზე ერთხელ უკვე ჩავარდა.