დიმიტრი ქუმსიშვილი - კერძო და საჯარო პარტნიორობის შესახებ კანონზე მუშაობა აქტიურ ფაზაშია

ფინანსთა სამინისტრო ეკონომიკისა და მდგრადი განვითარების სამინისტროსთან ერთად, აქტიურად მუშაობს კერძო და საჯარო პარტნიორობის (PPP) შესახებ კანონზე” , - ამის შესახებ პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა განაცხადა.

ქუმსიშვილის თქმით, აღნიშნული მიმართულებით, ასევე, ინტენსიური თანამშრომლობა მიმდინარეობს სავალუტო ფონდის ტექნიკურ მისიასთან, ევროპის რეკონსტრუქციისა და განვითარების ბანკთან, აზიის განვითარების ბანკთან.

„ეს არის ახალი შესაძლებლობები კერძო და საჯარო სექტორისთვის ინვესტიციების განხორციელების მიმართულებით. ეს არის შესაძლებლობა უკეთესი სერვისის შეთავაზების კერძო სექტორის ჩართულობით. კანონი ძალიან სასარგებლო იქნება ჩვენი ქვეყნისთვის. დოკუმენტი მნიშვნელოვანია, მათ შორის, ენერგეტიკის სფეროს განვითარებისთვის, რადგან გარანტირებული შესყიდვის ხელშეკრულებები აღნიშნული კანონის ქვემდებარე იქნება და შესაბამისად, ამ კანონით დარეგულირდება,“ - განაცხადა დიმიტრი ქუმსიშვილმა.

როგორც ”ინტერპრესნიუსს” ფინანსთა სამინისტროდან აცნობეს, მინისტრმა აღნიშნა,რომ კანონის გარდა, შესაქმნელია რამდენიმე განმახორციელებელი სტრუქტურა, გარდა ამისა, სამინისტროებში, მათ შორის, ფინანსთა სამინისტროში, გასაძლიერებელია ფისკალური რისკების მართვის მიმართულება.

როგორც ფინანსთა მინისტრმა აღნიშნა, კანონის პროექტის წარდგენა პარლამენტში მიმდინარე წლის ივნისში, ხოლო სტრუქტურების შექმნა და გაძლიერება 2018 წლის 1 იანვრისთვის იგეგმება.