დიმიტრი ქუმსიშვილი - ქუთაისის საერთაშორისო აეროპორტით მოსარგებლეთა 61% უცხოელი ტურისტია

საქართველოს პირველი ვიცე-პრემიერის, ფინანსთა მინისტრის დიმიტრი ქუმსიშვილის ხელმძღვანელობით, დღეს საქართველოს დელეგაცია ქუთაისის საერთაშორისო აეროპორტიდან ლარნაკაში გაემგზავრა. 

9-11 მაისს, ლარნაკაში ევროპის რეკონსტრუქციისა და განვითარების ბანკის ყოველწლიური შეხვედრა და ბიზნესფორუმი იმართება.

როგორც დიმიტრი ქუმსიშვილმა განაცხადა, ქუთაისის საერთაშორისო აეროპორტი ერთ-ერთი ყველაზე წარმატებული პროექტია.

„მინდა დიდი სიამაყით და სიხარულით აღვნიშნო, რომ ქუთაისის საერთაშორისო აეროპორტი ერთ-ერთი ყველაზე წარმატებული პროექტია. 2012 წლიდან დღემდე, ქუთაისის საერთაშორისო აეროპორტი, დაახლოებით, მილიონ მგზავრს მოემსახურა. მიღებული გვაქვს გადაწყვეტილება აეროპორტის ტერმინალის გაფართოების შესახებ. თუ დღეის მდგომარეობით, ტერმინალი ერთდროულად 600-მდე მგზავრს ემსახურება, გაფართოების შემდეგ, ტერმინალი 2200 მგზავრს მოემსახურება. ვიზალიბერალიზაციის შემდეგ, ქუთაისის აეროპორტის დატვირთვა კიდევ უფრო გაზრდილია. მოგეხსენებათ, ქუთაისის საერთაშორისო აეროპორტიდან ევროპისკენ 10 მიმართულებით ხორციელდება ფრენები და ეს რიცხვი სულ უფრო მატულობს. წინა წლის ანალოგიურ პერიოდთან შედარებით, მგზავრთა ნაკადი 114%-ით არის გაზრდილი და რა თქმა უნდა, ჩვენ საუკეთესო მომსახურებას ვუწევთ მგზავრებს. აქვე მინდა აღვნიშნო, რომ ტურისტებისა და მოგზაურთა რაოდენობის ზრდასთან ერთად, ძალიან მნიშვნელოვანია, თავად უცხოელი ტურისტების პროცენტული შემადგენელი - ქუთაისის საერთაშორისო აეროპორტის მოსარგებლეთა 61% სწორედ უცხოელი ტურისტია“, - განაცხადა დიმიტრი ქუმსიშვილმა.

ევროპის რეკონსტრუქციისა და განვითარების ბანკის ყოველწლიური შეხვედრისა და ბიზნესფორუმის ფარგლებში, დაგეგმილია დიმიტრი ქუმსიშვილის შეხვედრა ევროპის რეკონსტრუქციისა და განვითარების ბანკის პრეზიდენტთან, სერ სუმა ჩაკრაბარტისთან. ასევე, დაგეგმილია შეხვედრები აღნიშნული საერთაშორისო საფინანსო ორგანიზაციის სხვა ხელმძღვანელ პირებთან, აგრეთვე, საინვესტიციო კომპანიების წარმომადგენლებთან, რომლებიც ბანკის წლიურ შეხვედრაში მონაწილეობენ.