განსაკუთრებით დიდი ოდენობით უაქციზო სიგარეტის შენახვა, რეალიზაცია, გადაზიდვის ფაქტზე ორი პირი დააკავეს

თამბაქოს უაქციზო ნაწარმის შენახვა, რეალიზაცია, გადაზიდვის ფაქტზე ორი პირი დააკავეს.

როგორც საქართველოს ფინანსთა სამინისტროს საგამოძიებო სამსახური იუწყება, გატარებული ოპერატიულ-სამძებრო და საგამოძიებო მოქმედებების შედეგად, განსაკუთრებით დიდი ოდენობის აქციზური მარკის სავალდებულო დართვას დაქვემდებარებული თამბაქოს ნაწარმის შენახვა, რეალიზაცია, გადაზიდვის ფაქტზე, ორი პირი დააკავეს.

„გამოძიებით დადგენილია, რომ ერთ-ერთი ბრალდებული, წყალტუბოს რაიონში საკუთარი საცხოვრებელი სახლის სხვენში, შემდგომი რეალიზაციის მიზნით ინახავდა განსაკუთრებით დიდი ოდენობით აქციზური მარკის სავალდებულო დართვას დაქვემდებარებულ უაქციზო სიგარეტს, კერძოდ, 29 239 კოლოფ Master-ს, რომლის ნაწილიც, 7 500 კოლოფი უაქციზო სიგარეტი Master გაასაღა ერთ-ერთ ბრალდებულზე. საგამოძიებო სამსახურმა აღნიშნული პირი პროდუქციის გადაზიდვის მომენტში დააკავა, ხოლო დანარჩენი უაქციზო სიგარეტი საცხოვრებელი სახლის ჩხრეკის შედეგად ამოიღო“, - განაცხადეს საგამოძიებო სამსახურში.

მათივე თქმით, საქმეზე გამოძიება საქართველოს სისხლის სამართლის კოდექსის 200 -ე მუხლის მე -3 ნაწილით მიმდინარეობს, რაც სასჯელის სახით თავისუფლების აღკვეთას 6 -დან 8 წლამდე ვადით ითვალისწინებს.